Съезд идеясы – диалог пен өзара көмек

Ел басшылығының бастамасымен ортақ мүдделер мен өзара түсіністік негізінде құрылған әлемдік және дәс­түр­лі діндер лидерлері арасындағы диалог өзара ынтымақтастық үшін кең перспективалар ашады. Сондай-ақ за­ма­нымыздың зорлық-зомбылық, фанатизм, экстремизм және терроризм сияқты жағымсыз көріністерін еңсеруге ықпал етеді.

Әлемдік және дәстүрлі діндер көш­бас­шыларының I съезінде форумға қатысушылар съездің жұмыс органы – Хатшылықты құру туралы шешім қабылдады. Съезд хатшылығының басшысы Парламент Сенатының төрағасы, съезге қатысатын әлемдік діндер лидер­лерінің өкілдері, оның ішінде ислам, христиан, иудаизм, буддизм, даосизм, синтоизм, индуизм, халықаралық ұйым­дар өкілдері – мүшелері болып бе­кі­тілді.

Алдағы 11 қазанда Әлемдік және дәстүрлі діндер лидерлерінің бірінші съезінің шақырылғанына 20 жыл толуына орай съездің XXI хатшылығы өтеді. Осы жылдар ішінде Астана кон­­фессияаралық форумы дінаралық диалогтің басты халықаралық алаң­дарының бірі екенін дәлелдеді. Хат­шылықтың алдағы отырысында съездің жұмысын ұйымдастыру және оның мазмұнды бөлімдері жөніндегі мәсе­лелері талқыланады. «2023-2033 жыл­дар­ға арналған Әлемдік және дәс­түрлі діндер лидерлері съезін да­мы­ту тұжырымдамасы» атты ма­ңыз­­ды құ­жат қабылданады. Бұл тұжырымдама 2022 жылы өткен VII съезд бастамаларының бірі болды. Съездердің ерекше жауап­кер­шілікпен ұсынылған бастамалары шын мәнінде жүзеге асырылып, әлемде төзімділік, диалог және түсіну қағидаттарын ілгерілетуге қызмет етеді. Өтетін отырыстың күн тәртібі бойынша жемісті пікір алмасу кү­тіліп отыр.

Осы форумның тағы бір маңызды сәті – іс-шараның еріктілері ретінде ЖОО студенттерінің қатысуы болмақ. Бел­сенді жастар форум жұ­­мы­сы­на әрдайым қы­зығушылық танытып, қа­тыс­қысы ке­ле­ді, шетелдік деле­га­ция­ларға көмек­теседі, аудармашы болады. Шын мәні­сін­де съездің идеясы – диалог пен өзара көмекке бағытталған.

Жанар ҚАСЫМОВА,

Конфессияаралық және өркениетаралық диалогті дамыту орталығы жиынтық-талдау департаментінің директоры