Мәдениет және ақпарат министрлігіне қарасты «Есік» мемлекеттік тарихи-мәдени музей-қорығында «Отырар» мемлекеттік археологиялық музей-қорығының» ұйымдастыруымен «Ұлы Жібек жолы және Отырар алқабының қалалық мәдениеті» тақырыбында көрме ашылды.
Көрменің ашылу салтанатында «Есік» музей-қорығының директоры Гүлмира Мұхтарова сөз сөйлеп, мазмұнға бай тарихи жәдігерлер ұсынған әріптестеріне алғысын білдіріп, еліміздің тарихи-мәдени мұраларын дәріптеуде мұндай барыс-келістің маңызы ерекше екенін атап өтті.
Қонақтар делегациясын бастап келген «Отырар» мемлекеттік археологиялық музей-қорығының директоры Жангелді Махашов екі музей арасындағы әріптестік байланыстардың нығайып келе жатқанына тоқталды.
Сондай-ақ ол, киелі Отырар өңірінің тарихи-мәдени мұраларының кеңінен насихатталуына мән беріп, музейтану, археология саласындағы нәтижелі жұмыстар жүйелі жалғасатынын жеткізілді.
«Көне Отырарды зерттеу, ғылыми саралау – сонау ортағасырлық саяхатшылар мен тарихшылардан бері жібін үзбей жалғасып келеді. Бүгінде Отырар әлемдік ескерткіш болып ЮНЕСКО тарапынан мойындалды. Қазір Отырар өңірін ғылыми зерттеу жұмыстары Ә.Марғұлан атындағы Археология институты мен «Отырар» мемлекеттік археологиялық музей-қорығы жүргізіп жатқан қазба жұмыстарымен жалғасып келеді», – деді Жангелді Меңлібайұлы.
Айтулы көрменің ашылу салтанатында Әл-Фараби атындағы Қазақ ұлттық университеті тарих факультетінің деканы, профессор Досбол Байқонақов сөз сөйлеп, университет ғалымдары еліміздегі музей мамандарымен бірлескен ғылыми жобаларды іске асырып отырғанын айтты.
Рухани-мәдени жиын барысында Еңбекшіқазақ ауданы Қаракемер ауылдық мәдениет үйінің өнерпаздары ән-жырдан шашу шашып, көпшілікке көтеріңкі көңіл-күй сыйлады.
Сонымен қатар музей директоры Гүлмира Райылқызы «Есік» музей-қорығымен белсенді әріптестік орнатқан «Отырар» музей-қорығының қызметкерлері мен мектеп мұғалімдеріне алғысын білдіріп, арнайы марапаттады.
Көрме – «Ұлы Жібек жолы және Отырар Х-ХІ ғғ», «Отырар-Қарахан дәуірінде», «ХІV-ХV ғғ. Темір дәуіріндегі Отырар», «ХVІ-ХVІІІ ғғ. Отырар Қазақ хандығы тұсында», «Отырардағы жазба мәдениетінің пайда болуы» тақырыптарын қамтыған. Көрме экспозициясымен «Отырар» музей-қорығының қызметкері Ерлан Әскерини Отырардан табылған тарихи жәдігерлер жөнінде жан-жақты мағлұмат беріп, таныстырды.
Көрмеде «Отырар» музей-қорығы қоры жинағындағы археологиялық экспонаттар – керамикалық бұйымдар, нумизматикалық материалдар, шыныдан жасалған заттар, сирек кездесетін жәдігерлер, ескерткіштерге қатысты аэрофотолар мен карталар ұсынылды.
Алматы облысы