Астана халықаралық әуежайынан жолаушылар биометриялық сәйкестендіру арқылы тіркеуден өтуі мүмкін. Қазір әуежай басшылығы елорданың әуе қақпасына заманауи технологияны енгізу мүмкіндіктерін қарастырып, кедергілерді сараптап жатыр.
Биометриялық сәйкестендіру арқылы тіркеу жүргізуді қолданысқа енгізуге еліміздегі биометриялық базаның бір жерге шоғырландырылмағаны кедергі боп тұр. Сондықтан аталған мәселені жуық арада шешу әрі әуежайдағы цифрландыру деңгейін арттыру маңызды.
– Астана халықаралық әуежайы IATA халықаралық әуе көлігі қауымдастығы мен ICAO халықаралық азаматтық авиация ұйымымен тығыз әріптестік орнатқан. Біз осы халықаралық ұйымдардың стандарттарына сәйкес әуежай қызметін дамытуды жалғастырамыз. Биометриялық сәйкестендіру бағдарламасын енгізуді авиация саласындағы телекоммуникация және IT бағдарламаларды даярлауға негізделген швейцариялық ақпараттық ұйым SITA-мен бірлесе жүргізуге ниеттіміз. Биометриялық сәйкестендірудің көмегімен жолаушылар рейске тіркелу кезінде қажетті операциялардың барлығын орындауға, құжаттарды өз бетінше толтыруға және басып шығаруға, төлқұжаттың электронды нұсқасын толық қолдануға мүмкіндік алады, – дейді «Нұрсұлтан Назарбаев халықаралық әуежайы» АҚ басқарма төрағасы Ерғазы Жолдасов.
Айта кету керек, SITA-мен алдын ала келісім бойынша 27-30 қараша күндері жолаушыларды биометриялық сәйкестендіру арқылы тіркеу бағдарламасы Астана халықаралық әуежайында сынақ режімінде іске қосылады. Сынақ режіміне арнайы фокус-топ құрылған. Еске сала кетейік, жолаушыларды биометриялық сәйкестендіру арқылы тіркеу Дубай, Сингапур, Ганконг, Сербия және Пәкістанның халықаралық әуежайларында кеңінен қолданылады.