1973 жылы халық батыры Амангелді Имановтың 100 жылдығына орай ашылған Арқалықтағы «Дала аймағының тарихы» облыстық мұражайы өзі жұмыс істеп тұрған жарты ғасырлық кезең ішінде өңір тарихының алтын сандығы іспеттес рухани-мәдени қазынаның орталығына айналды.
Мұражай ғимараты осыдан бірнеше жыл бұрын жөндеуден өткен. Биыл музей экспозициясын қайта жаңғырту жұмыстары жүріп жатыр.
«Қазір музейдің екінші және үшінші қабатындағы экспозицияларды қайта құрып жатырмыз. Бұл экспозицияларда адамзат дәуірінің алғашқы кезеңдерінен бастап, қазіргі кезеңге дейінгі аралықтағы Қостанай, Торғай өңіріне қатысты тарихи деректер хронологиялық жүйе бойынша қамтылып отыр. Музей қорын толықтырып жатқан жаңа материалдар бар. Мысалы, кейінгі жылдары ашылған Торғай геоглифтеріне қатысты деректер қойылып жатыр. Осыдан біраз жыл бұрын меценат Сапар Ысқақовтың қолдауымен Торғай өңірінде археологиялық қазба жұмыстары жүргізілген. Одан кейін Ұлттық музейдегі Халық қазынасы институты бірнеше жылдық грант ұтып алып, археологиялық зерттеу жұмыстарын әрі қарай ілгерілеткен. Сол жұмыстардың нәтижесінде төрт қорғаннан табылған үш саба, тағы басқа да жәдігерлер мұражай экспозициясынан орын алды. Сонымен қатар кейінгі кезде табылған Балғожа бидің суреті, Шегеннің Қазбегінің суреті, Ахметсапа Юсуповтың өз қолымен жазылған ғұмырбаяны секілді құнды-құнды дүниелер, осы өлкенің тарихын жасауға үлес қосқан тұлғалардың портреттері, құжат көшірмелері мұражай қорын толықтырып отыр», дейді музей қызметкері, ақын Батырлан Сағынтаев.
Музей қорында қазір 76 мыңнан аса жәдігер сақтаулы тұр. Олардың ішінде Әбілхан Қастеев салған Амангелдінің портреті, Амангелдінің қанжары, Кейкі батырдың үйіне тиесілі кебеже, сармат дәуіріне жататын күмістен жасалған ат әбзелінің бір бөлігі секілді құнды жәдігерлер бар.
Қостанай облысы