Дина Нұрпейісова атындағы академиялық қазақ халық аспаптары оркестрінің репертуары өте бай. Өнер ұжымы қазақтың және әлемнің танымал композиторларының туындыларын орындайды. Жақында оркестр Мажарстан астанасы – Будапешт қаласындағы House of music залында өнер көрсетті.
Тәуелсіздік күніне орайластырылған концертті Атырау облысы әкімдігінің қолдауымен Қазақстан Республикасының Мажарстандағы елшілігі ұйымдастырды. Елші Жәнібек Әбдірашовтың айтуынша, екі ел арасындағы ынтымақтастықты, мәдени байланысты нығайту көзделген.
Концерттік зал сахнасында оркестр ұжымы қазақ және әлем классиктері – Құрманғазы Сағырбайұлы, Дина Нұрпеиісова, Жаяу Мұса, Ахмет Жұбанов, Нұрғиса Тілендиев, Евгений Брусиловский, сондай-ақ Иоган Штраустың шығармаларын орындады. Мажар көрермендері қазақтың ұлттық аспаптарынан төгілген сиқырлы сазды тыңдап, бай шығармашылық репертуарға ықыласын білдірді. Әсіресе «Балбырауын», «Адай» күйлері мен «Қорқыт» композициясы ерекше қызықтырды. Жергілікті көрермен Иоганнес Брамстың «Мажар билері №5» композициясын тосын сый ретінде қабылдады.
«Әуен мен әнді тыңдағанда ерекше сезім пайда болды. Халық музыкасы әрқашан көне заманнан келе жатқан оқиғаларды бейнелейді. Көшпелі халықтарды дүниеге әкелген ұлы даланың музыкалық мұрасын естідік. Қазақ жаратылысынан өте дарынды, мәдениеті бай, әдемі дауысы бар халық екен», деп пікір білдірді мажарлық көрерменнің бірі.
Көрерменді «Күй тартыстың» энергетикасы дүр сілкіндірді. Күйшілердің орындау шеберлігі мен домбыраның қуатты үніне ықыласпен қол соқты.
Атырау облысы