ФИФА-ның ресми сайтында 2023 жылдың қорытындысы бойынша аталған ұйымның рейтингінде ең көп ұпай жиған ұлттық құрама командалардың тізімі жарияланды.
Биыл Еуропа чемпионатының іріктеу турнирінде Қазақстан футболшылары тәуір өнер көрсетті. Олар 10 кездесуден кейін 18 ұпай жиып, Н тобында үшінші орынды иеленді. Алдымызда – Дания мен Словения. Ал Финляндия, Солтүстік Ирландия және Сан-Марино құрамалары артымыздан сығалап қалды. Осы нәтиже арқылы +52,07 ұпайды еншілеген жерлестеріміз ФИФА рейтингінде бесінші орынға табан тіреді.
Отандық аяқдоп шеберлеріміз Панама (+83,92 ұпай), Молдова (+63,72), Малайзия (+56,27) және Экваторлық Гвинеядан (+52,77) ғана қалып қойды. Одан кейінгі сатыларға Гайана (+49,40), Аустрия (+48,86), Португалия (+42,52), Колумбия (+42,51) және Ямайка құрамалары (+42,25) жайғасты.