Биыл елімізде ірі халықаралық жоба – «Көшпелілер ойыны» өтетіні мәлім. Халқымыздың ғасырдан-ғасырға, ұрпақтан-ұрпаққа ұласқан ұлы құндылықтарын әлем назарына ұсынатын осы бір айтулы додаға дайындық жұмыстары басталып кетті. Соның бірі ұлттық ойындарымыздың төресі саналатын құсбегілік өнері дер едік.
«Төрткүл дүние көз тіккен үлкен іс-шараға өткен жылдан бері Ұлттық спорт түрлері қауымдастығы жан-жақты дайындықты бастап, федерациялар жер-жерде бірнеше кезеңнен тұратын іріктеу жарыстарын ұйымдастырып келеді. Сондай іс-шараның бірі, ұлттық спорт түрі «Құсбегілік» бойынша Талғар ауданындағы Панфилов аулының атшабарында іріктеу жарысы өтті. Бұл бәсекеге облыстық ұлттық спорт мектептерінің әр аудандағы «Құсбегі» бөлімінің оқушылары, өрімдей жас өркендердің көптеп келуі көңілімізді көкке көтерді. Жас ерекшеліктеріне қарай қыран құс салудың үш түрі бойынша өнерлерін ортаға салғандардың барлығы ертеңгі болатын әлемдік додаға ел атынан өзіндік үлестерін қоса алатын намысты әрі шебер спортшылар екенін байқатты. Желкілдей өсіп келе жатқан жасөспірімдердің ұлттық дәстүрді ұлықтап, бойына сіңірудегі талпыныстары мен ынта-жігерлеріне ризашылығымыз шексіз», дейді республикалық «Құсбегілік» федерациясының вице-президенті Бағдат Мүптекеқызы.
Ересектер, жастар мен жасөспірімдер арасындағы бұл іріктеу чемпионатына ауа райының қолайсыздығына қарамастан, шалғайдағы Райымбек, Кеген аудандарымен қатар, іргедегі Еңбекшіқазақ, Талғар, Іле, Жамбыл, Қарасай аудандарынан 50-ге жуық құсбегі қатысып, өз мүмкіндіктерін сынға салды.
Жасөспірімдер арасында ұлттық спорт мектебінің оқушылары, атап айтсақ, ителгі салудан Ханшерей Қайратұлы, қаршыға салудан Жамбыл Досымжан, бүркіттен Лиман Асқарбек, ал жастар арасында Бәйетбай Өмірхан, Медет Шәліпов, Данияр Мүптекеев сынды үздіктер анықталды.
Қолына қыран құсты қондырған жас буынның бабалар аманатына адалдығы мен оны баптап-баулудағы талпынысы болашағынан зор үміт күттіреді.
Алматы облысы