Елімізде кәсіби еріктілердің мобильді тобы құрылады. Бастаманы Мәдениет және ақпарат министрлігі мен Төтенше жағдайлар министрлігі бірге қолға алған. Қазір қос сала өкілдері оқыс оқиғалардың алдын алып, салдарын жоюда ескерілетін арнайы алгоритмді әзірлеп жатыр.
Былтыр республикада төтеннен келіп, халықты абдыратқан оқыс оқиғалар аз болмады. Мәселен, 2023 жылдың жазындағы Абай облысындағы алапат өрттен 60 мың гектар орман алқабы жанып кетті. Осы тұста әр өңірдің белсенділері бір жағадан бас, бір жеңнен қол шығарып, көмегін аямады. Төтенше жағдайлар департаменттерімен ынтымақтастықта жұмыс істеген еріктілер қауіпсіздікті қадағалап, аймақ тұрғындарын сақтыққа шақырды. Апат айтып келмейді десек те халқымыз қашанда «Сақтансаң – сақтайды» дейді. Сондықтан жауапты сала мамандары жан-жақты қамдануға біртіндеп кіріскен. Жаңадан құрылатын еріктілердің мобильді тобы – осының айғағы.
– Төтенше жағдайлардың алдын алу және олардың салдарын жою саласындағы волонтерлік қызметті дамыту мақсатында Төтенше жағдайлар министрлігі волонтерлік ұйымдармен, оның ішінде Ұлттық волонтерлік желімен белсенді өзара іс-қимыл жасайды. 2024 жылы Ұлттық волонтерлік желімен бірлесіп, қанатқақты жоба аясында Қостанай облысының базасында төтенше жағдайларға ден қою саласында волонтерлердің мобильді тобын құру жоспарланған. Осы топ үшін ТЖМ кәсіби авариялық-құтқару құралымдарын дайындауға ұқсас дене шынықтыру даярлығы бойынша 10 күндік даярлау және нормативтерді тапсыру бағдарламасы әзірленеді. Оқыту Қостанай облысы ТЖД базасында ұйымдастырылады деп жоспарланған. Даярлау бағдарламасы төтенше жағдайлардың салдарын жою мақсатында волонтерлердің осындай мобильді топтарын құру үшін өңірлерге жіберіледі. Іс-шара 2024-2026 жылдарға арналған Волонтерлікті дамыту мен қолдаудың Жол картасы аясында іске асырылады деп көзделіп отыр, – деді Төтенше жағдайлар министрлігінің ресми өкілі Жанна Дәуренбекова.
Бүгінде еліміздегі 136 волонтерлік ұйым, оның ішінде 47 мыңнан аса волонтер Төтенше жағдайлар министрлігі құрылымдарымен бірлесе жұмыс істейді. Олар тұрақты дайындықтан да өтіп отырады. Кейінгі үш жылды есепке алсақ, 3,5 мыңнан аса қоғам белсендісі салаға қатысты ведомстволарда оқыс оқиға кезіндегі қарым-қабілеті мен білім-білігін шыңдаған.
– Төтенше жағдайлар министрлігі үкіметтік емес ұйымдармен бірлесе бірнеше бағыт бойынша жұмысты ұйымдастырады. Атап айтқанда, табиғи апаттардан зардап шеккен адамдарға көмек көрсетуге қатысу, гуманитарлық көмек көрсету. Екіншіден, төтенше жағдайлардың алдын алуға және олардың салдарын жоюға қатысу. Үшіншіден, жоғалған адамдарды іздеу бойынша іздеу-құтқару жұмыстарына қатысу, – деді баспасөз хатшысы.
Волонтерлер – елдің ұйымшылдығы мен бірлігін қажет ететін іс-шаралардан тыс қалмайтын жандар. Күні бүгінге дейін осы жанашырлар өрттің, газдың шығуының алдын алу, су айдындарындағы қауіпсіздікті сақтау бағытындағы түрлі жиынға белсене қатысқан. Өткен жылдың өзінде 1 700-ден астам профилактикалық іс-шарада бой көрсеткен.
Қазіргі таңда былтыр еріктілердің халықаралық форумның қорытындысы бойынша министрлік төтенше жағдайлардың салдарын жою кезеңінде волонтерлердің қауіпсіздігін қамтамасыз ету үшін мемлекеттік органдармен және волонтерлік ұйымдармен бірлесіп, оқыс оқиғалардың алдын алу және олардың зардабымен күресу жолына волонтерлерді тарту алгоритмі жан-жақты талқыланып, әзірленіп жатыр.