Ұлттық және ат спорты түрлері орталығы 2023 жылдың қорытындысы бойынша аймақтардың рейтингін жариялады. Былтыр ұлттық спортты серік еткендер 11 спорт түрінен сайысқа түсті. Жыл басынан бастап ұлттық спорт түрінен жекелеген ішкі чемпионаттар, кубок бәсекелері, ұлттық спорт фестивалі, халықаралық жарыстар мен әлемдік додалар өтті.
Бір жылдың қорытындысы бойынша 17 облыс пен 3 қаланың арасынан Түркістан облысы үздік атанды. Оңтүстіктің спортшылары былтырғы жарыстарда жалпы саны 58 алтын, 52 күміс, 65 қола жүлдемен көш бастады. Оның 13 алтынын түркістандықтар қазақ күресінен еншілеп, рекордтық көрсеткішті тіркеді. Өңір өкілдері ұлттық спорттың дамуын жүйелі жолға қойған.
«Бүгінгі таңда Түркістан облысында 7 облыстық, 23 аудандық, 7 қалалық спорт мекемесінде ұлттық спорт түрлерінен бөлімшелер жұмыс істейді. Сонымен қатар облыстық денешынықтыру және спорт басқармасы спорт мектептеріндегі регламенттің сақталуын қадағалап, жаттықтырушылар мен әдіскерлерге оқу-жаттығу сабақтарына әрдайым әдістемелік көмек көрсетеді. Өткен жылы ұлттық спорт түрлерінен жарыс ережелеріне өзгерістер мен толықтырулар енгізілді. Атап айтқанда, аударыспақтан бұрын 8 салмақ дәрежесінде жарыс өтсе, биыл 9 салмақ дәрежесінде бақ сынасты. Сондай-ақ теңге ілу және жамбы ату спортынан бұрын 3 стиль бойынша 1 ғана спортшы қатысатын, биыл 3 стильге 3 спортшы қатыса алатын мүмкіндік туды. Қатысушылар саны көбейді. Нәтижесінде, спортшыларымыз тамаша өнер көрсетіп, еліміздегі ұлттық спорт түрлерінен ең үздік өңір екенін дәлелдеп, жалпыкомандалық есепте 1-орынды иеленді», деді Түркістан облыстық денешынықтыру және спорт басқармасының басшысы Қанат Жолдықарев.
Ұлттық және ат спорты түрлері орталығы баспасөз қызметінің хабарлауынша, рейтингте екінші орынды Астана қаласы иеленді. Елордалықтар аталған жарыстардан 24 алтын, 19 күміс, 28 қола жүлде еншіледі. Әсіресе астаналық дәстүрлі садақ атушылар алдына жан салмады. Ал үздік үштікті Шымкент қаласының спортшылары түйіндеді. Мегаполис намысын қорғаған оғландар 24 алтын,19 күміс, 20 қола жеңіп алған. Шымқалада да қазақ күресінің бәсі жоғары. 24 алтынның 11-і қазақ күресінің балуандарына тиесілі. Өкінішке қарай, ұлттық спортты әлі де дамытуды қажет ететін аймақтар бар. Әсіресе Қостанай, Ұлытау, Шығыс Қазақстан облыстарының нәтижелері төмен.
«Кейінгі жылдары елімізде ұлттық спорт қарқынды дамып келеді. Оның дәлелі 2023 жылдың өзінде біздің спортшылар халықаралық ареналардағы жарыстардан 35 алтын олжалады. Қазір орталыққа қарайтын 11 спорт түрі бар. Әрқайсысының дамуы жүйелі жолға қойылған. Сонымен қатар оларды заманауи талаптарға сай қылу мақсатында соңғы үлгідегі технологияларды да қосып жатырмыз. Біз жыл сайын ұлттық спорттағы үздік өңірлерді анықтап отырамыз. Өздеріңіз білетіндей, бұл жағынан еліміздің оңтүстік аймағы алда тұр. Әсіресе Түркістан облысы өзгелерден көш ілгері. Мұның барлығы – аймақтағы спортқа жауапты мамандардың, спорт басқармасының жүйелі жұмысының арқасы. Сонымен қатар Астана қаласы қарқынды дамудың жолына түскен. Бұл өңірде асық ату, тоғызқұмалақ, дәстүрлі садақ ату, құсбегілік және қазақ күресінің өкілдері алда келеді. Дегенмен ат спортына қатысты мәселелер бар. Бұл алдағы уақыттың еншісінде шешілетін дүние деп есептеймін. Бұйырса, барлық нәтиженің қорытындысын биыл өтетін Дүниежүзілік көшпелілер ойнында көреміз», дейді Ұлттық және ат спорты түрлері орталығының директоры Бақдәулет Сәбитов.
Сөйтіп, ұлттық спорттың жоспарланған шаралары толығымен аяқталды. Енді биыл әр спорт түрінен ішкі біріншіліктер ұйымдастырылады. Сонымен қатар ұлттық құрама мүшелері халықаралық жарыстарға қатысып, ел намысын қорғайды. Ал ең басты мақсатымыз – қыркүйек айында өтетін Дүниежүзілік көшпелілер ойындарында барынша табысты өнер көрсетіп, барша қазақ жұртын жарқын жеңістерімізбен қуанту.