Жақында Ақтөбе облысының делегациясы Оңтүстік Корея мен Қытайға барып екі елдің іскер топтары мен туризм саласындағы бірқатар компания өкілдерімен кездесіп қайтты. Сеул, Пекин мен Шанхай қалаларындағы жүзден аса туристік компания өкілдерімен кездесуде «Visit Aktobe» туристік ақпараттық орталығы Ақтөбе өңірін тартымды туристік бағыт ретінде қалыптастырудың стратегиясын ұсынды. Соның ең бастысы – әнші Димаш Құдайберген атындағы «Dimash tour» жобасы.
Талантты әншінің туған жері, өскен ортасы, оқыған жері туралы білгісі келетін шетелдік туристер үшін ашылатын мүмкіндіктер туралы «Visit Aktobe» туристік ақпараттық орталығының директоры Ерсайын Сүйінов айтып берді.
– «Dimash tour» жобасына Ақтөбедегі Димаш Құдайбергеннің өскен үйі, оқыған мектебі мен алғашқы музыкалық қабілетін ашқан Ахмет Жұбанов атындағы музыка колледжін де қосып отырмыз. Ең алдымен, қонақтар Ақтөбедегі облыстық тарихи-өлкетану музейіне келіп, халқымыздың тарихымен, этнографиясымен танысады. Содан кейін Димаш оқыған мектепті көріп, әрі қарай музыка колледжіне келеді. Бұл жерде Димаштың ұстазы, әнші әрі оқытушы, Қазақстанның еңбек сіңірген қайраткері Марат Әйтімовпен кездесу ұйымдастырылып, ол Димаш оқыған дәрісханада қонақтарға шеберлік сабағын өткізеді. Колледж ғимаратында концерт ұйымдастырылып, қойылымдар ұсынылады. Одан кейінгі бағыт – Димаш Құдайбергеннің туған үйі. Бұл үй қазір музейге айналған. Шетелдіктерге Ақтөбенің көрікті жерлері мен тарихи орындары да таныстырылады. Оған Тахауи Ахтанов атындағы драма театры, «Нұр-Ғасыр» мешіті, кафедралды шіркеу кіреді. Оңтүстік Корея мен Қытайға барған топтың ішінде Димаш Құдайбергеннің ұстазы Марат Әйтімов те болды, – деді Е.Сүйінов.
Кейінгі жылдары Ақтөбе облысында тарихи, экологиялық туризм бағыты біршама дамып келеді. Байғанин ауданындағы Ақтолағай борлы қыраттары мен Аққұм құмдары, Қарғалы ауданындағы Мылқау тау, Қарғалы су қоймасы мен Қасқыр сарқырамасы, Мәртөк ауданындағы аққайың тоғайы, Мұғалжар ауданындағы Орқаш табиғи қорығы, Ойыл ауданындағы Барқын құмдары, Ырғыз ауданындағы «Ырғыз-Торғай» табиғи резерваты ақтөбеліктер мен экологиялық туризмді ұнататындарға жақсы танымал. Әсіресе жаз айларында табиғаты бір-біріне ұқсамайтын осы жерлерді тамашалағысы келетіндер саны артады. Кей туристер жердің шалғайлығына қарамастан Байғанин ауданы мен Ырғыз ауданындағы табиғат аясына екі-үш күн қонып, тау-тасын аралап келуге өте ықыласты.
Бүгінде Ақтөбе облысындағы киелі жерлерге апаратын маршруттар да жақсы жолға қойылды. Мәселен, Ойыл ауданындағы Көкжар жәрмеңкесі, Темір ауданындағы Досжан ишан мешіті, Алға ауданы Бестамақ ауылындағы Есет Көкіұлы кесенесі, Қобда ауданындағы Абат Байтақ пен Қобыланды батыр кесенесі, Әйтеке би ауданындағы Хан моласы, Шалқар ауданындағы Есет-Дәрібай кесенесі киелі орындарды зиярат етушілерге жақсы танымал.
Е.Сүйіновтің айтуынша, 2023 жылы Ақтөбе облысына келген туристер саны 2022 жылмен салыстырғанда 33,5%-ға көбейген. Ресми статистика бойынша 2023 жылдың алғашқы тоғыз айында өңірге 36 668 турист келсе, басқа елдерге туристік жолдамамен 34 542 ақтөбелік шыққан. Осы мәлімет өңірде ішкі туризм бағытының жылма-жыл дамып келе жатқанын көрсетеді. Димаштың табиғи талантына, жоғары орындаушылық өнеріне тәнті болғандар оның ұшқан ұясын көруге, қазақ халқының мәдениетімен танысуға асығады. Жыл сайын Димаштың туған жерін көруге шетелден 100-ден аса турист келеді. Былтыр Димаштың әні арқылы қазақ мәдениетін тануға құштар болып келген шетелдіктер үшін Ақтөбеде бірнеше тур ұйымдастырылды.
Сеул қаласында өткен «Road Show» шарасы кезінде оңтүстіккореялық әнші Сон Вон Саб Ақтөбе облысының туристік амбассадоры болуға ниет білдірген. Қазақ және корей әндерін шырқайтын Сон Ақтөбеге келіп «Visit Aktobe» туристік орталығымен ынтымақтастықты дамыту жөнінде меморандумға қол қойды. Амбассадор Оңтүстік Кореяда қазақ өнері мен музыкасын насихаттап қана қоймай, біздің жаққа туристер бағыттап отырмақшы.
Осылайша, өнер арқылы халықтар мәдениетін жақындастыру «Ақтөбе облысының туристік амбассадорлары» мен «Dimash tour» арқылы жалғаспақшы. Мақсат – танымал тұлғалар арқылы аймақтық туризмді дамыту. Сырттан келетін туристерді өзгеше жолмен, тың маркетингтік стратегиялар арқылы тарту тез нәтиже береді.
Ақтөбе облысы