Бүгінде Еуропаның бірқатар клубы қазақ футболшыларына қызығушылық танытып жатыр. Бұл жаңалықты естіген жанкүйерлер қатты қуанып отыр. Себебі олар қарт құрлықта өнер көрсетіп, шеберліктері әбден шыңдалған ойыншылар келешекте тұралап қалған Қазақстан футболының жаңа деңгейін көтеруге елеулі үлес қосады деп үміттенеді.
Жоғарыда айтылған сөзіміз дәлелді болу үшін бірнеше мысал келтірейік. «Ақсуда» жасындай жарқылдаған 18 жастағы жартылай қорғаушы Ілияс Әбіл Португалияның «Жил Висенте» клубымен келісімшартқа отырды. Әзірге ол жастар арасындағы жарыста өнер көрсетеді. Егер алдағы матчтарда Павлодар футбол мектебінің түлегі өзін жақсы қырынан көрсетсе, онда Примейра-лигада «Порту», «Бенфика», «Спортинг», «Брага» секілді атақты командаларға қарсы ойнайтыны анық.
Қазақстан біріншілігінің екінші лигасында ғана ойнаған Дінмұхамед Сайынға түріктердің көзі түсті. Алматының «Академия 05» клубының 18 жастағы жартылай қорғаушысы «Самсунспордың» жастар құрамасы сапында алаңға шығып та үлгерді. Беларусь чемпионатында «Энергетик БГУ» клубы сапында Әбинұр Нұрымбет өрелі өнерімен көзге түсті. 12 матчта екі мәрте нысананы дәл көздеген Тараздың тастүлегі алты рет оңтайлы пас берді. Содан кейін Әбинұр бірден Хорватияның «Локомотивінен» шақырту алды. Ол да 18 жаста, амплуасы – жартылай қорғаушы.
Жоғарыда есімдері аталған футболшылармен түйдей жасты атыраулық қақпашы Дулат Таласбаев «QJ League» жастар лигасында өте жақсы ойнады. Сегіз кездесуде 41 сейв жасап, бірден көрермендердің көзайымына айналды. Былтыр жыл соңында ол Дания біріншілігінің екінші дивизионында күш сынасып жүрген «Хегеге» ауысты.
19 жастағы «Жетісудың» жартылай қорғаушысы Давид Есімбековке Новороссийскінің «Черноморец» клубы «құда түсті». Қазіргі кезде Қара теңіздің жағалауында жасақталған команданың жағдайы мәз емес. Олар Ресейдің бірінші лигасында ең соңғы орынды қанағат тұтып тұр. Бәлкім, Давид секілді дарын иесі «Черноморецтің» ойынына жаңа леп пен тың серпін әкеледі деген үміт бар.
Кезінде Ислам Чесноков пен Владислав Васильев сынды танымал футболшылар шеберліктерін шыңдаған, бұл күндері Денис Митрофанов еркін ойқастап жүрген Беларусьтің «Ислочь» клубына 19 жастағы «Қайраттың» қыраны Мирас Көбеев ауысты. Мамандардың айтуынша, ол – әмбебап ойыншы. Қандай позицияға қойса да, өзіне жүктелген міндетті абыроймен атқаруға Көбеевтің қарым-қабілеті жетеді. Сондықтан да бұл жігіт үшін «Ислочь» кезекті баспалдақтың бірі деп есептейміз. Дәл осы бағытынан жаңылмаса, Мирас келешекте қарт құрлықтың ТОП командаларының бірінің жейдесін киетініне күмәніміз жоқ.
Дәл сол Беларуське Данил Анкудинов та аттанды. Қарағандыда туып-өскен 20 жастағы жігіттің таңдауы Могилевтің «Днепріне» түсті. Жалпы, Данил бұған дейін де біраз шетелдік командалардың намысын қорғады. Атап айтсақ, Мәскеудің «Родина-2», Молдованың «Шериф», Арменияның «Ван» және Литваның «Джюгасында» ойнады. Анкудиновтың ең үздік көрсеткіші – 2022 жылғы Молдова чемпионы және ел кубогы иегері.
Сондай-ақ қазіргі кезде Қазақстанның тағы бірқатар дарынды аяқдоп шебері шетелдің түрлі клубтарында сынақтан өтіп жатыр. Бірақ олармен әлі келісімшарт жасалған жоқ. Сол себепті де бұл футболшылар жайында әңгіме айтуға әлі ерте. Десек те алдағы уақытта жерлестеріміз танымал командалардың қатарына қосылып жатса, онда жағымды жаңалықтармен бөлісеміз. Осылайша, алыс-жақын шет мемлекеттерде шеберліктерін шыңдап жүрген отандастарымыздың қатары көбейіп келеді. Енді біз оларды Англияның Премьер-лигасы, Испанияның Ла Лигасы, Италияның А сериясы, Германияның Бундеслигасы, Францияның 1 лигасы секілді ТОП дивизиондардан көруді армандаймыз!