Ұлыс күніне орай Қалибек Қуанышбаев атындағы қазақ музыкалық драма театрының халық аспаптар ансамблі «Әз Наурыз келгенде...» атты мерекелік концертін тарту етті. Ансамбльдің дирижері әрі көркемдік жетекшісі – Мәдениет саласының үздігі Маралжан Мырзақұлова.
Ән-күй думанында жаңа бағытта өңделген халық және халық композиторларының туындылары, сондай-ақ ансамбль мүшелерінің авторлық шығармалары орындалды. Ал олардың театр актерлерімен жасаған шоу-коллаборациясы көрермен көңіліне ерекше әсер қалдырды.
Дирижер М. Мырзақұлованың айтуынша, әлемдік сахнадағы тәжірибесі мен жетістіктігінің арқасында ансамбль әр концертіне жаңаша мазмұн мен соны сипат беруге тырысып келеді. «Ұжымның құрылғанына үш-ақ жылдың бедері болды. Алайда осы қысқа уақыт ішінде ансамбль бірнеше халықаралық байқаулардың жеңімпазы атанды. Ұжымның Орта Азияны, қала берді Еуропаны бабалар сазымен әуелеткені – біз үшін үлкен мәртебе әрі жауапкершілік. Ансамбль дәстүрлі ән-күйлермен қатар, қазіргі заман композиторларының шығармаларына да баса назар аударады. Оның ішінде ұжымдағы авторлардың туындылары көрермен қауымның ыстық ықыласына бөленіп келеді», дейді ол.
Расында солай. Көрерменнің күннен-күнге артып келе жатқан қарасын көріп, ансамбльдің тұрақты әрі жеке аудиториясы қалыптасқанын баса айта аламыз.