Салық Зиманов пен Сұлтан Сартаев. Бұл тұлғалардың есімі мен еңбегін барша қазақ жұрты жақсы біліп, ерекше құрметпен атайды. Іргелі білім иелері еліміз егемендік алғанда тәуелсіздігіміздің іргетасын қалап, нық тұруына көп күш-қайрат жұмсады. Яғни қазақ мемлекеттілігінің заңдық тұрғыда негізінің берік болуы жолында Егемендік туралы декларацияның, Тәуелсіздік туралы заңның қабылдануына заң ғылымының докторлары, академиктер өлшеусіз еңбек сіңірді.
1998 жылы түсірілген мына суретте қос заң саласы алыбының емен-жарқын әңгімелесіп тұрғаны бейнеленген.
Сурет авторы – қазақ фотоөнері көшбасшыларының бірі, кезінде ҚазТАГ-та қызмет істеген, одақтық АПН ақпарат агенттігінде штаттан тыс тілші болған, «әкемтеатр» – Мұхтар Әуезов атындағы академиялық драма театрының фотошежірешісі атанған, байтақ қазақ жерін түгелге жуық аралап, мыңдаған көз сүйсіндіретін кадрды дүниеге әкелген Қалиғұмар Қабдешев.
– Сурет Алматы қаласындағы Мәншүк Мәметова мен Карл Маркс (қазіргі Д.Қонаев) көшелерінің қиылысына жақын жерде түсірілді, – дейді Қалиғұмар аға. – Өйткені сол маңда Сұлтекең ашқан Қазақ құқықтану және халықаралық қатынастар институтының (КИПМО) ғимараты орналасқан еді. Ол кезде Салық аға да осы институт студенттеріне дәріс оқиды екен. Өз басым осындай асыл азаматтарды, заңғар заңгерлерді объектив қарауылына алғаным үшін де мың мәрте шүкіршілік етемін!
Берікбай ҚАДЫҚОВ,
журналист