«Қазақтан суретші шықты» деген сөзді айтқызған Әбілхан Қастеевтің мол мұрасы – бүгінгі ұрпаққа олжа. Өнерлі жанның таланты тағдырына айналса, есін білер-білмес бала кезінен-ақ ұшқынданып, қылаң беретіні анық. Әйгілі суретшілердің бәрінің алғашқы шығармашылығы топыраққа, қабырғаға, ақ қағазға түскен шимайдан басталды. Әбілхан Қастеев те ең алғашқы суреттерін тасқа қашап салған.
Әрине, бүгінгі қылқалам ұстаған тәуелсіз ұрпақ алғашқы талпынысын мүлдем басқаша бастаған болар. Десе де егемен елдің еркін өрендерінің өнердегі алғашқы ұстазы Қастеев екені сөзсіз. Әлқисса.
Күні кеше ғана Бейбітшілік және келісім сарайының «Құланшы» заманауи өнер орталығында Қазақстанның халық суретшісі Әбілхан Қастеевтің 120 жылдығына арналған Қазақ ұлттық өнер университетінің көркемсурет факультеті студенттерінің шығармашылық жұмыстарының көрмесі өтті.
Көрмеге іріктелген, үздік туындылар қойылған. Әр шығармадағы түрлі қолтаңба, түрлі талғам, түрлі шеберлік бірден байқалады. Жаңаша көзқарастары да айрықша көрініп тұр.
Аталған көрмеге жас суретші Ерасыл Ораздың бірнеше туындысы қойылыпты. Әсіресе Шоқан Уәлихановты бейнелеген суреті назарды бірден аударады.
«Бұл суретті салуға екі апта уақытымды жұмсадым. Әрине, өз ойыңнан салған суреттен біреудің суретін қағазға түсіру оңайырақ. Мәселен, Әбілхан атамыздың Шоқан Уәлихановты бейнелеген суретін салу қиынға соқпады. Шамам келгенше Шоқанды шынайы келтіруге тырыстым. Әрине, сурет өнерінен хабары аз адамдарға сырттай бәрі тамаша көрінгенімен үйренеріміз көп. Гуашпен салынған сурет көрерменнің көңілінен шыққанына қуаныштымын. Бүгін ерекше шабыттанып тұрмын», дейді суретші.
Көрмеге келушілердің ыстық ықыласына бөленген тағы бір суреттің авторы – Мәдина Оразаева.
Оның Әбілхан Қастеевті салған суреті жанарды алыстан баурайды.
«Бұл сурет майлы бояумен салынды. Туындыны бір семестр бойы, яғни жарты жыл салдым. Бұл – менің алғашқы ірі көрмем. Жиналғандар суретті жоғары бағалап жатқанына қуаныштымын», дейді Мәдина.
«Құланшы» өнер орталығының жетекшісі Ләйла Махаттың айтуынша, жыл сайын 14 мамыр – Қазақ ұлттық өнер университеті көркемсурет факультеті студенттерінің шығармашылығына арналады.
«Елімізде талантты балалар көп. Олар тасада қалмай, шығармашылық қабілетін шыңдауға тиіс. Әсіресе Қазақ ұлттық өнер университетіне республиканың түкпір-түкпірінен дарынды студенттер жиналған. Біз өз тарапымыздан талантты жастарды қолдауға дайынбыз», деді ол.
Айта кетейік, көрме барысында Қазақ ұлттық өнер университеті студенттерінің ұйымдастыруымен сән көрсетілімі өтті.