Қазақстан басшысының «Нұрлы Жол – болашаққа бастар жол» Жолдауы – нақты істерге негізделген тарихи құжат. Оны оқи отырып, Қазақстанның болашаққа деген батыл ұмтылысын анық аңғардым. Шын мәнінде, Қазақстан Президентінің Жолдауынан сырт қалған мәселе жоқ. Онда әлеуметтік-тұрмыстық түйткілдердің барлығы атап көрсетіліп, одан шығудың жолдары айқындалған. Қазақстанның барлық аймағын сапалы жолдармен байланыстыру, шағын және орта кәсіпкерлікті дамыту, индустриялық инфрақұрылымдарды қалыптастыру, әлеуметтік саладағы: білім беру, денсаулық сақтау, жастарға қолдау көрсету мәселелеріне айрықша мән беру, халықты тұрғын үймен қамту, әр отбасының әлеуметтік тұрмысын жақсарту Жолдаудың басым бағыттары болып отыр.
Мен Түркия мемлекетінің азаматы болсам да, өмірімнің ең маңызды кезеңдері Қазақстанмен байланысты өтіп келеді. Осы елде білім алдым, алғашқы еңбек жолымды бастадым, перзенттерімді де қазақ топырағында өсіріп жатырмын. Мен де Қазақ елінің дамуына үлес қосушы азамат ретінде Мемлекет басшысының Жолдауындағы «Қазақстанның шыққан шыңы мен бағындырған биіктерінің ең басты себебі – бірлік, берекесі», – деген терең мағыналы тұжырымды қуаттаймын. Президент үнемі еліміздегі ішкі бірлікті нығайтуға, ұлттар татулығына селкеу түсірмеуге, ұлт пен ұлыстардың татулығы мен бірлігі мемлекет тұрақтылығының кілті екендігін әрдайым есте сақтауға шақырып келеді. Осы Жолдауда да ел бірлігіне айырықша назар аударылған.
Жалпы, Нұрсұлтан Назарбаевтың мән-маңызы жоғары Жолдауы Қазақстанның өркендеуіне серпіліс беретініне, елді жарқын болашаққа бастайтынына сенімім зор. Бұл құжатта қамтылған мәселелерді барша қазақстандық терең ұғына білсе, елдің өрісі кеңейіп, өркені өсе түсері сөзсіз.
Орхан ОЗТОМСУК,
«Нұр Орда» қазақ-түрік лицей кешенінің директоры.
АСТАНА.