Қазақстанның Сауда және интеграция министрі Арман Шаққалиев Қытай Халық Республикасының Коммерция министрі Ван Вэньтаомен кездесті. Вэньтао елімізге ҚХР төрағасы Си Цзиньпиннің мемлекеттік сапары аясында келген. Кездесу барысында сауда-экономикалық ынтымақтастық, экспортты ілгерілету және электронды коммерция мәселелері қарастырылды, деп хабарлайды Egemen.kz министрліктің баспасөз қызметіне сілтеме жасап.
Арман Шаққаливтің айтуынша, Шанхай ынтымақтастық ұйымының саммиті қарсаңындағы бұл кездесу маңызды сипатқа ие, өйткені ол сауда саласында қол жеткізілген келісімдерді іске асырудың негізгі бағыттарын айқындайды. 2024 жыл «Бір белдеу – бір жол» жаһандық бастамасын одан әрі ілгерілету үшін маңызды жыл.
«Өткен жылдың қараша айындағы кездесуде біз өзара сауда көлемін $40 млрд-қа жеткізу туралы айтқан болатынбыз. Бүгін тауар айналымын айтарлықтай арттыру бойынша жаңа өршіл мақсат қойылды. Біз қытай тарапына жоғары сапалы стандартталған өнімнің кепілді көлемін ұсынып, олардың қажеттіліктерін қанағаттандыруға дайынбыз. Ең бастысы, біз QazTrade экспортты ілгерілету компаниясы мен Экспорттық-кредиттік агенттігінің шикізаттық емес экспортты дамыту және ілгерілету жөніндегі ұлттық институты аясында қазақстандық бизнеске сенімді серіктестік ұсына аламыз», деп хабарлады Сауда және интеграция министрі.
Екі ел арасындағы жұмыс істеудің негізгі бағыты салалық ерекшеліктері мен экономикалық құрамдастарын ескере отырып, аймақтандыру қағидаты бойынша әрбір провинциямен ынтымақтастықты дамытуға бағытталған. Бұл тәсіл қазірдің өзінде Сычуань, Цзянсу және ШҰАР провинцияларында бейімделіп жатыр.
«Біз қазірдің өзінде Қытай үшін негізгі ауыл шаруашылығы тауарлары бойынша оң нәтижелерді байқап отырмыз. Өткен жылдың осы кезеңімен салыстырғанда ШҰАР-мен сауда 50%-ға өсті, оның ішінде экспорт 35,3%-ға артты. Сычуань провинциясына экспорт 30%-ға, ал Цзянсуға экспорт 10 еседен астам өсті. Осы жылдың қыркүйек айында Нанкинде «Орталық Азия – Цзянсу» ірі сауда орталығы ашылады», деп қосты Арман Шаққалиев.
Министрдің айтуынша, маңызды бағыттардың бірі - Орталық Азия тауарларын ілгерілету және аймақ өнімдерін Қытайдың электрондық коммерция платформаларындағы Орталық Азия онлайн павильоны немесе C5+Қытай форматындағы сауда алаңында интеграциялау. Қытайдың Alibaba.com (B2B сегментінде) және jd.com (B2C сегментінде) ірі маркетплейстерімен ынтымақтастық орнатылған.
«ҚХР-мен сауда-көлік байланысын жақсарту аясында біз Орталық Азия өнімдерін Қытай нарығына қолжетімділікті жақсарту үшін электрондық сауда, сауда байланысы және аймақтық жоба «Қытай - Орталық Азия» бастамасын ұсынуды ұсынамыз. Мұнда қытай тарапынан серіктестер мен олардың ресурстарын тарту, ал біздің тарапымыздан QazTrade-ті тарту ұсынылады, ол бұл жобаны іске асыруда Қытайдағы әріптестермен ынтымақтастықта әдістемелік және консультациялық қолдау көрсетеді», деп атап өтті министр.
Сонымен қатар ҚХР Коммерция министрі Ван Вэньтао сапар аясында ҚХР Коммерция министрлігі Қазақстан Үкіметімен сауда, энергетика, ауыл шаруашылығы, көлік және басқа да салаларды қамтитын жол картасына қол қоятынын атап өтті.
«Электрондық коммерция саласындағы ынтымақтастығымыз аясында біз осы бағытта кіші комитетіміз аясында жұмыс тобын құра аламыз. Біз сондай-ақ қазақстандық экспорттаушыларды Қытай нарығында қолдау көрсетіп, QazTrade компаниясымен тығыз ынтымақтасуға дайынбыз. Біздің министрлікте осы ынтымақтастық аясында практикалық міндеттерді орындайтын Сауда дамуы бюросы жұмыс істейді», деді ҚХР Коммерция министрі Ван Вэньтао.
Кездесу соңында Арман Шаққалиев Қазақстанның Шанхай көрмесіне қатысуды жалғастыруға ниетті екенін және қазақстандық компаниялардың қатысуын ұйымдастыруда көмек пен қолдау көрсеткені үшін ҚХР Коммерция министрлігіне алғысын білдірді.