Елімізде көктем айынан бері «Таза Қазақстан» республикалық экологиялық акциясы жүріп жатыр. Бұған өңіріміздің әрбір азаматы ерекше үлесін қосып келеді. Әсіресе бұл бастамада жастар жағы белсенділік танытқаны қуантады. Еңбек ардагерлері де немерелерін жетектеп, бір тал ексе де туған жерді түлетуге атсалысып жатыр. Осылайша, акция тұтас елді бір мақсатқа жұмылдырып жіберді десек артық айтқандық болмас. Ал мұның еңбекті насихаттаудан бөлек, табиғатты аялауға жұртты үндеуінің өзі – бір төбе.
Әрбір аптасы бөлек ұлағатты тақырыппен өтетін экоакция Шымкентте де өз қарқынынан танған жоқ. Мінеки, соның аясында Шымсити шағын ауданындағы саябаққа қоғам белсенділері бір кісідей тазалық жұмыстарына шықты. Ал оларға Абай ауданы әкімі аппараты мен Абай коммуналдық мемлекеттік мекемесінің қызметкерлері, сондай-ақ Жастар ресурстық орталығының еріктілері көмекке келді. Осылайша, табиғатқа жанашыр азаматтар білекті сыбанып тастап шілденің ыстығында еңбек көрігін жарыса қыздырды.
Бір қуанарлығы, тазалық іс-шарасынан шет қалған қала тұрғыны кемде-кем. Бәрі де сүйікті қаласы үшін сенбілікте аянбай тер төкті. Саябақтан бөлек шымшаһардың Темірлан тасжолы бойындағы гүлзар, Алматы тасжолы, Ақмешіт аумағы қоқыстан тазартылды. Асармен басталған баянды іске 200-ден аса адам, 12 техника жұмылдырылды. «Ең бастысы, қаланың таза болуы – өзімізге жақсы», дейді маңдай терін жеңімен сүрткен сенбілік еңбеккерлері.
Экологиялық акцияны ұйымдастыруға қалалық экология департаменті ұйытқы болды. Мекеме осынау маңызды бастама аясында «Таза жағалау» іс-шарасын қолға алып, жұртты шақырды. Өз кезегінде қала тұрғындары да бейжай қарамай, сенбілік өтетін аумақтың алыстығын қиынсынбай, ағайынгершілік таныта білді. Сонымен, ұйымдастырушылар бұл жолғы акцияның мақсаты өзендер мен көлдердің, жалпы су айдындарының жағалауларын қоқыстан тазарту екенін айтты. Бұдан су ресурстарының экожүйесін қалпына келтіру, су объектілерін тұрмыстық, өндірістік қалдықтардан тазалау мен ластануын болдырмау мақсаты жатқанын айқын сеземіз.
Ал осынау іс-шараға экология департаменті мамандарымен бірге Тұран ауданы әкімдігі де атсалысты. Олар Бадам өзенінің бойын жағалай қалдықтардан тазалап шықты. Кішкене деректерді сөйлетсек, тазаланған аумақ ауданы – 3 500 шаршы метр, орылған шөп аумағы – 2 100 шаршы метр, қатысқан адамдар саны – 55, соңғы шығарылған қоқыс 14 тонна болды.
Өз кезегінде Ішкі саясат және жастар істері жөніндегі басқармасының Жастар ресурстық орталығы да игі істе жарысқа түсіп, «Игі істер марафоны» жобасын бастап кетті. Бұл да – экологииялық акция. Соның аясында Қаратау ауданындағы «Нұрсәт» гүлзары тап-тұйнақтай тазаланып, сәні кіріп қалды. Бұл күнгі жұмыс ағаштардың түптерін әктеу, орындықтарды сырлау, шашылып жатқан қоқысы арнайы контейнерге салу болды. Ең бастысы, өткен-кеткен жұрт арам шөбі оталған, сан-алуан түсті гүлдердің жайнап, құлпырып тұрғанына дән риза. Бұл іс-шараның жыл бойы жалғасатыны қандай ғанибет. Өйткені жастардың осындай ұжымдық еңбекте ынтымағы артып, өзара бауырмалдық сезімдері оянады. Одан да бөлек, табиғаттың тазалығы адамға қаншалықты маңызды екенін жүрегімен, ой-санасымен терең сезініп, түйсінеді. Біз көрген жастардың белсенді жұмыстарына тазалық қызметін атқаратын кәнігі мамандардың өзі өте риза болды.
Нағыз патриотизмді сөзбен емес, нақты ісімен дәлелдеп жатқан жастардың еңбектегі бейнесін қоғамға көрсету мақсатында жұмыс үстінен түскен БАҚ өкілдеріне Жастар ресурстық орталығы Қаратау ауданы жастарымен жұмыс жүргізу бөлімінің басшысы Бекарыс Бахадыр арнайы сұхбат беріп, экоакцияның ізгі бағыты жайында ойын жеткізді.
«Президент Қасым-Жомарт Тоқаевтың бастамасымен басталған акция көктемнен бері жалғасын тауып келеді. Бұл игі іс-шара тек Шымкентте емес, еліміздің біраз өңірінде де өз мақсатына сай атқарылып жатыр. Ал бұл аптада жастар «Игі істер марафонының» туын желбіретті. Соның аясында қаланың біраз жері тазалық жұмыстарының қызған алаңына айналды. Жалпы, осы күнге дейінгі атқарылып келген «Таза Қазақстан» экоакциясына шаһардың еңбектеген баласынан еңкейген қартына дейін қатысты десем, артық айтқандық емес. Жастармен бір кісідей атсалысып жатқан қаланың тұрғындарына жастар атынан алғысымды білдіргім келеді. Сондықтан осы сәтті пайдаланып, өз замандастарыма, алдыңғы буын ағалар мен артымыздан ерген інілеріме қаланы таза ұстайық деп ұран тастап, игі іске бір үйдің баласындай жұмылуға шақырамын. Келесі апталарда акцияны мегаполистің Сайрам елді мекенінде өткіземіз. Өйткені ол жерде тарихи-мәдени нысандар мен ескі қорым кесенелер өте көп. Солардың тазалығына жауап беру де бабалар алдындағы парыз деп білеміз. Жалпы алғанда тазалық іс-шарасына 500-ге жуық ерікті жас қатысты», деді ол.