Қазақстан Қытайға 75 млн долларға ет пен мал жеткізуді жоспарлап отыр. Республиканың ауыл шаруашылығы саласында Қазақстан-Қытай серіктестігінің маңыздылығы артып келеді.
Қазақстан Қытайға 75 млн доллар болатын ет пен мал жеткізуді жоспарлап отыр. Бұл шешімге Ауыл шаруашылығы министрлігінің өкілдері мен Қытайдың «CITIC Construction» және «Beijing Capital Agro» компанияларының басшылық құрамы кездесуінің арқасында қол жеткен. Кездесуге Қазақстанның «Meat processing and Servis company», «Елімай Көкпекті», «Астана Агро Продукт» ЖШС, «Agro Silk Way», «Жаке» ШҚ, «Қазақстан ет одағы» қауымдастығының өкілдері қатысқан.
– Қазақстанның Ауыл шаруашылығы министрлігі Мемлекет басшысының экспортты ұлғайту жөніндегі тапсырмасы және Қазақстан мен ҚХР арасында қол қойылған ветеринарлық талаптар жөніндегі хаттама шеңберінде жұмысты жалғастырып жатыр, – делінген басылым мақаласында. Сондай-ақ министрлік ауыл шаруашылығы саласындағы Қазақстан-Қытай серіктестігінің маңыздылығына жеке тоқталған. Былтыр Қазақстан мен ҚХР арасындағы АӨК өнімдерінің тауар айналымы 1,3 млрд долларды құрады, бұл 2022 жылмен салыстырғанда 67 пайызға артық. ҚХР-ға ауыл шаруашылығы өнімдерін экспорттау көлемі 2 есе өсіп, 1 млрд долларға жетті. Ендігі жерде мал шаруашылығы өнімдері есебінен экспорт көлемі ұлғайтылмақ.