Дәрі-дәрмек таңбаланды

Дәрі-дәрмекті цифрлық таңбалаудың негізгі себебі – контрафактінің етек алуы, дәрілік заттардың елге заңсыз тасымалдануы. Мұндай жағдайдың көп болуы халықтың денсаулығына тікелей қауіп төндіреді. Сондай-ақ дәрілік заттарды цифрлық таңбалау әрбір дәрінің қозғалысын онлайн бақылауға, сұранысты бағалауға және қажетті резервтерді қалыптастыруға мүмкіндік береді.

Дәрілік заттарды цифрлық таңбалау жүйесі әрбір дәрінің заттың қаптамасында өнім түп­нұс­қалығын тексеруге болатын бірегей «data matrix» цифрлық кодтарын пайдалануды көздейді. Оны сканерлер, деректерді жинау терминалдары, POS-терминалдар және телефон камералары арқылы сканерлеуге болады.

– Кәсіпорындарда цифрлық таңбалау кезінде мәселе туындаса, біз техникалық жағынан көмек көрсетуге дайынбыз. Бірден айыппұл салып, кәсіпкерлерге қысым көрсетпейміз. Басында түсіндіру жұмыстары жүргізіледі. Мәселен, азаматтар қолданатын дәрі-дәрмектің 85 пайызы елімізде өндіріледі. Яғни өндіріс орнында, тауарды бірден цифрлық таңбалау қажет болады. Жаңа заңды ескермегендер жауапкершілікке тартылады, – дейді Фармацевтикалық қызметті бақылау басқармасының басшысы Ерік Құлшанов.

Дәрілік заттарды таңбалау және қадағалау жүйесінде жұмыс істеу үшін дәріханалар ақпа­раттық жүйеде дәрілік заттарды қабылдауы қа­жет. Ол үшін жеке компьютер, деректерді жинау терминалы немесе ұялы телефон («iOS» немесе «Android» негізіндегі смартфон) болса жеткілікті. Көптеген қадағалау фунциясы да бар. Одан басқа тегін «Naqty Onim» қосымшасы тұтынушылар­ға өнімнің дәріхана сөрелеріне дейін толық жолын, сатып алынған дәрінің Денсаулық сақтау министр­лігі белгілеген шекті рұқсат етілген бағаға сәй­кес келетінін айтып береді. Егер таңбалау кодын сканерлегеннен кейін сатып алушы дәрінің жарамды­лық мерзімі өтіп кеткенін немесе дәрі-дәрмектің құны рұқсат етілген бағасынан жоғары екенін анықтаса, онда ол шағымды қосымшада қалдыра алады.