Жаңа оқу жылы қарсаңында жаз бойы жайма-шуақ жатқан шаһарда абыр-сабыр тіршілік басталады. Өйткені қаздай тізіліп, мектепке бет алған оқушылар мен топтасқан студенттер тағы бір оқу жылының бастау алғанын білдіреді. Осындай сәтте бір үйдің үмітін арқалап, қалаға жеткен жастарды ойландыратын басты мәселе – жатақхана екені рас.
Осыған байланысты өңірдегі оқу орындарының жағдайын саралап көрдік. Сыр білімінің қара шаңырағы саналатын Қорқыт Ата атындағы Қызылорда университетінде бұл мәселе толық шешімін тапқан. Осы күні университет балансында 780 орынға арналған 4 студенттік жатақхана бар. Сонымен қатар әріптестік келісімшарт негізінде «Қаржы орталығы» АҚ қаржыландырылатын «Өркениет», «ДиЛМАШ», «Инкар 7» ЖШС жатақханаларынан 680 орын пайдалануға беріледі.
«Осылайша, қазір оқу орны жатақханадан студенттерге 1 460 орын ұсынып отыр. Бүгінге дейін 1027 студент жатақханаға жолдама алды. Сонымен қатар 25 қандас университеттің білім грантымен, шет мемлекеттен келген тағы да 15 жас арнайы даярлық курсында білім алады. Бұлардың бәрі жатақханамен толық қамтылады», дейді университеттегі баспасөз қызметінің мамандары.
Студенттерді жайлы жатақханамен қамтып отырған оқу орнының бірі – «Болашақ» университеті. Университет Абай көшесінің бойындағы бұрынғы ғимарат іргесінен зәулім жатақхана салып, білім алушыларға барынша жағдай жасаған еді. Қаланың сол жағалауынан бой көтерген қазіргі кампус құрамында да 2 бірдей жатақхана тұр. Бірі – 111, екіншісі – 92 орындық 5 қабатты қос ғимарат, ішінде оқу залы, демалыс бөлмесі, спорттық жаттығу залы мен медпункт, студенттер кеңесіне арналған бөлмелері бар.
М.Мәметова атындағы Қызылорда педагогикалық жоғары колледжі де – осы салаға талай мыңдаған маман даярлаған байырғы оқу орнының бірі. Колледж директоры Жақсыгүл Тоғанованың айтуынша, оқу орнында 248 орынға арналған жатақхана бар.
Осыдан 5 жыл бұрын Қызылорда медициналық жоғары колледжі студенттері үшін 330 орындық жаңа жатақхана салынып, пайдалануға берілген. Демалыс орнымен қатар медициналық пункт, оқу залы бар жатақхана тоңазытқыш, қысқатолқынды пеш, кір машинасы секілді тұрмыстық техникалармен қамтылған. Жатақханада мәдени іс-шара жүйелі өтіп тұрады. «Orda» жоғары колледжіндегі 100 орынға арналған жатақханада да алыс аудандардан келген студенттерге барлық жағдай жасалған.
Былтыр облыстағы білім жүйесін дамытудың өңірлік жол картасы қабылданған. Оқу-ағарту министрлігі мен жергілікті әкімдік бірлесіп жүзеге асыратын жол картасында 8 бағыт бойынша 107 іс-шара жоспарланыпты. 2023-2029 жылдар аралығын қамтитын құжатқа қол қою барысында облыста студенттер үшін 2 жатақхана бой көтеретіні де айтылды.
Жалпы, білім саласындағы ауқымды жобаларды жүзеге асыруға жекелеген компаниялар қосқан үлес мол. Кейінгі 10 жылда мұнай компаниялары өңірдің әлеуметтік-экономикалық дамуына 16 млрд 600 млн теңгеден астам қаржы аударыпты. Бүгінде «ҚазГерМұнай» компаниясы 2 млрд 350 млн теңгеге 350 орындық заманауи үлгідегі Оқушылар сарайын салып жатыр. «Саутс Ойл» компаниясының демеушілігімен қаланың сол жағалауынан музыкалық колледждің құны 4 млрд 800 млн теңге болатын 650 орындық жаңа ғимарат құрылысы да бой көтеріп келеді.
Қызылорда