Мемлекеттік қызмет істері агенттігінің төрағасы Дархан Жазықбай Жетісу облысына жұмыс сапарымен барып, өңір басшылығымен, мемлекеттік қызметшілер және жастармен кездесті, деп хабарлайды Egemen.kz ҚР МҚІА баспасөз қызметіне сілтеме жасап.
Облыс активімен кездесуде Дархан Жазықбай мемлекеттік қызметті жаңғыртуға қатысты Мемлекет басшысы алға қойған міндеттерді жүзеге асыру аясында атқарылып жатқан іс-шаралар жайында айтты. Олар мемлекеттік аппаратты бюрократиядан арылтуды, оны адамға бағдарланған сервистік сипатта дамытуды, мемлекеттік қызметке кіруді барынша ашық етуді, жастардың және жеке сектордағы кәсіби мамандардың мемлекеттік қызметке келуін жеңілдетуді қамтиды.
Агенттік төрағасы отандық мемлекеттік қызметті дамытудың 2024-2029 жылдарға арналған тұжырымдамасы қабылданып, оның қолданыстағы жүйені заман талаптарына сай жетілдіруге бағытталғанын айтты. Ол саладағы жаңашылдықтар Президент атап көрсеткен «Адам мемлекет үшін емес, мемлекет адам үшін» деген іргелі қағиданы негізге ала отырып жүзеге асырылып жатқанын атап өтті.
«Баршаға тең мүмкіндіктер тудыратын әділдік принципін негізге алу және адал, ашықболу мемлекеттік қызметшілер үшін басты ұстанымға айналу қажет. Мемлекет басшысының Қазақстан халқына жолдауындағы«Кез келген істің басты өлшемі тиімділік болуға тиіс. Яғни, әрбір шешім, әрбір жоба ең алдымен елге пайдалы болуы қажет» деген сөзін мемлекеттік қызметшілер өз қызметінде негізгі бағдарға алуы тиіс», деді МҚІА төрағасы.
Сапар аясында Дархан Жазықбай облыс бойынша биыл Өңірлік кадр резервіне іріктелген жастармен арнайы кездесті. Ол резервке іріктеу әрбір өңірде тың өзгерістерді іске асыруға қабілетті жас басқарушылардың пулын қалыптастыруға бағытталғанын және оларға үлкен жауапкершілік жүктейтінін айтып, алда атқарар жұмыстарына сәттілік тіледі.
Сондай-ақ Дархан Жазықбай Қаратал және Кербұлақ аудандарының Халыққа қызмет көрсету орталықтарында болып, мемлекеттіккөрсетілетін қызметтердің сапасымен танысты. Айта кету керек, Жетісу облысында ағымдағы жылдың 1 жартыжылдығында 2,5 млн. астам мемлекеттік қызмет көрсетіліп, оның 98,4%-ы электрондық нысанда ұсынылған. 2023 жылы мемлекеттік қызмет көрсету сапасының қоғамдық мониторингінің нәтижелері бойынша Жетісу облысы республика бойынша 9-орынды иеленген.
Жұмыс сапары барысында Дархан Жазықбай облыстық «Jetisu» телеарнасына мемлекеттік қызметті дамытудың жаңа тұжырымдамасының негізгі бағыттары меноларды жүзеге асыру шаралары туралы сұхбат берді.