Елорда төрін дүбірге бөлеген V Дүниежүзілік көшпелілер ойындарының басталғанын көрсетіп, қала тұрғындары мен қонақтарға құшағын жайған «Көшпелілер әлемі» этноауыл да жұмысын бастады.
8-13 қыркүйек аралығында «Қазанат» ипподромының маңынан бой көтерген этноауылда күнде думан, күнде той. Мұнда этноспорт сайыстардың тартысынан сырт мәдени бағдарламалар да көпшілік назарына ұсынылады. Қазақ халқының бай мұрасы мен дәстүр салтын дәріптейтін «Шаттық керуені» шерумен ашылған ауылдың базары Дүниежүзілік көшпелілер ойындары біткенше тарқамайды. Этноауылға табаны тиген тұрғындар мен қала қонақтары көшпелілер әлеміне бойлап, өр рухты терең сезінеді.
«Өнер ордасы» аталатын бас сахнада күнде әр өңірден келген үздік өнер ұжымдары өнер көрсетіп, «Думанды дала» концерті өтеді. Этнофольклорлық ансамбль, қазақ ұлттық оркестрлері әнмен көмкерсе, би топтары дәстүрлі этностық стильде өнер көрсетеді. Қазақтың төл мұрасы айтыс та көшпелілер ойындарының даңқын асырып, әр өңірден келген үздік айтыскер ақындар сара сөз додасына түседі.
«Көшпелілер әлемінің» ішінде ірге тепкен этношатыр алаңы қонақтарға қолөнер шеберлері мен ісмерлердің туындыларынан көрме ұйымдастырылса, «Шығыс базарына» келген көпшілік қазақтың ұлттық тағамдарын ұсынған мейрамханалардан дәм татады. Дүниежүзілік көшпелілер ойындарының рәмізі саналатын кәдесыйларды да осы маңнан табасыз. Орталық алаңда ұлттық ойын түрлерін қамтыған балалар алаңқайы да бар. Халық музыкасына арналған сахна, ашық аспан астындағы көшпелі халықтың бай мұрасыннан сыр шертетін өркениеттер мұражайы, спорттық іс-шаралар өтетін орын да бар.
«Көшпелілер әлемі» этноауылда өтетін іс-шараның барлығына кіру тегін. Күнделікті сағат 11.00-ден түнгі 21.00-ге дейін аралауға болады. Астанада өтіп жатқан Дүниежүзілік көшпелілер ойындарына орай «Қазақ елі» монументі, «Ататүрік» паркі, «Бәйтерек» монументі мен Орталық саябақта да этноауылдар ашылып, қала тұрғындары мен қонақтарына концерттік бағдарлама ұсынылып, спорттық ойындардан сайыс өткізіледі.