Павлодар облысында тұрғын үйлерді жылуға қосу жұмыстары тәмамдалып қалды. Қазірде Ақсу қаласындағы барлық тұрғын үй жылуға қосылған. Ал Павлодар мен Екібастұздағы іс-шаралар бір-екі күнде аяқталуы тиіс.
Үш қаладағы әлеуметтік нысандардың барлығы бүгінде жылумен толық қамтылған. Ақсу қалалар арасында ең алғашқы болып барлық әлеуметтік мекемелерді және үйлерді жылуға қосты. Ал Павлодар қаласындағы 1 300 көппәтерлі үйдің тек 21-іне ғана жылу кірмеген.
«Бұл үйлердің сыртқы және ішкі желілерінде апаттық жағдайлар анықталғаны себепті жылу кеш беріліп жатыр. Жөндеу жұмыстары жүргізіліп, жылумен қамту мекемесінің қызметкерлері гидравликалық және температуралық режімді реттеп жатыр. Негізі жылу беруді 9 қыркүйекте бастадық. Бастапқы бетте әлеуметтік нысандар қамтылды», деп хабарлады Павлодар қаласы әкімінің баспасөз қызметі.
Павлодар қаласының әкімі Хасар Хабылбеков жылу параметрлері бірден қалыпты болмайтынын ескертіп отыр.
«Тұрғындар пәтерлеріндегі батареялар бірден қызбайды. Жылу желілерін толтыру біршама уақыт алады. Желідегі су айналымы 22 мың тоннаны құрайды. Ал жылу электр орталығындағы желілік сумен толтырудың ең жоғары мүмкіндігі – тәулігіне 800 тонна көлемінде. Осыған байланысты қаланы жылумен қамтуды толық іске қосу және баптау үшін бізге біршама уақыт қажет», деді шаһар басшысы.
Екібастұз қалалық тұрғын үй инспекциясы бөлімінің басшысы Әлібек Байділдин шаһарда 300-ден астам көпқабатты тұрғын үй жылуға қосылып үлгергенін мәлімдеді. Қалада жалпы саны 700 тұрғын үй және 6 мыңнан астам жер үйлер орналасқан. Мұндағы жылуға қосу жұмыстары алдағы екі күнде толық аяқталады деп жоспарланып отыр.
Ақсу қалалық ішкі саясат бөлімінің басшысы Әсемгүл Ракимова 16 қыркүйектен бастап әлеуметтік нысандарға, 23 қыркүйектен тұрғын үйлерге жылу жіберілгенін айтады. Металлургтер шаһарында 265 тұрғын үй мен 44 әлеуметтік нысан бар.
Биыл Үкімет Павлодар, Екібастұз және Ақсу қалаларында жылу желілерін салуға және реконструкциялауға арнайы резервтен 9 млрд теңге бөлінді. Аталған қаражат есебінен (3,6 млрд теңге) Павлодарда ұзындығы 2,5 шақырым болатын ТМ-13 жылу магистралі салынды. Бұл 41,5 мың адам тұратын Павлов – Шевченко – Катаев көшелері аумағындағы көппәтерлі тұрғын үйлерді тұрақты жылумен қамтамасыз етуге мүмкіндік береді. Ал Екібастұзда жалпы ұзындығы шамамен 4 шақырым болатын ТМ-1 және ТМ-3 жылу магистралдарының учаскелері реконструкцияланды (3,6 млрд теңге). Қалған 1,8 млрд теңге Ақсудағы №3,5 және 8 шағын аудандарда орналасқан, ұзындығы 4,3 шақырым болатын орамішілік жылу желілерін қайта жаңартуға аударылды. Соңғы 2 жылда аталған учаскелерде 40-тан астам ақау тіркелген. Реконструкция жұмысы 1,5 мыңнан астам тұрғынды сапалы жылумен қамтамасыз етуге мүмкіндік береді деп күтіліп отыр.
Павлодар облысы