Елімізде Президент Қасым-Жомарт Тоқаевтың бастамасымен «Халық үніне құлақ асатын мемлекет» тұжырымдамасы жүйелі жұмыс істеп келеді. Жалпыхалықтық референдум – соның айқын дәлелі.
Референдум өткізу – демократияның ажырамас бөлігі. Елімізде де халқымызды толғандырған өзекті тақырыптарды қоғаммен бірлесе шешу дәстүрі қалыптасып келе жатқанын атап өткен жөн. 2022 жылы конституциялық өзгерістерге байланысты референдум өтсе, енді міне, елдің әлеуметтік, экономикалық, энергетикалық дамуына қатысты жалпыхалықтық референдум өтіп отыр. Аталған үдерістер – еліміздің демократиялық құндылықтарды орнықтыруға, жаңа саяси дәстүр мен мәдениетті қалыптастыруға бағытталған жүйелі дамуының бір айғағы.
Осы орайда елдік мәселеге бейжай қарамай, өзінің конституциялық құқын қолдана отырып, маңызды шешім қабылдауға халқымыз белсенді атсалысқанын да атап өткен жөн. Бұл азаматтық қоғамның дамуы жолындағы оң үрдіс десек болады.
Қазіргі таңда ауыл әкімдерін сайлау, 2025 жылдан бастап аудан мен облыстық маңызы бар қала әкімдерін сайлау сияқты маңызды реформалар үдерісі өтіп жатыр. Мұның барлығы да жергілікті мемлекеттік басқару тетіктерін заманға сай жетілдіруге бағытталған өзгерістер, халқымыздың мемлекеттік басқару тетіктеріне қатысуын арттыратын реформалар.
Жоғарыда аталған үдерістерді саралай келе, еліміз демократиялық даму жолында реформалар пакетін жүйелі түрде іске асырып келеді деп айтуға негіз бар.
Бауыржан СЕРІКБАЕВ,
Қазақстан қоғамдық даму институтының сарапшысы