Еліміз Орталық Азиядағы «Google for Startups» жаһандық компаниясымен бірге акселератор жүргізетін алғашқы және жалғыз мемлекет мәртебесінде қала бермек. Биылғы «Silkway Accelerator 2024» бағдарламасына елімізден бөлек, Өзбекстан, Қырғызстан, Әзербайжан, Моңғолия, Тәжікстан, Пәкістан, АҚШ, Ұлыбритания, Оңтүстік Корея және БАӘ елдерінен 238 стартап қатысуға ниет білдірген еді. Солардың 13-і ғана қатаң іріктеуден өтіп, жобаны сәтті аяқтады.
Он екі апта бойы қатысушылар халықаралық сарапшылармен тәжірибе алмасып, масштабтау стратегияларын әзірледі. Оларға тегін тұрғын үй мен кеңсе бөлмелері ұсынылды. Нарықтағы беделдерін нығайту үшін воркшоптар, менторлық қолдау мүмкіндіктері беріліп, стартаптардың инновациялық бизнес модельдерін дамытуға ықпал етті. Сонымен қатар бағдарлама аясында ірі халықаралық компаниялармен маңызды келісімдер жасалды.
«Google for Startups»-пен ынтымақтастық орнатқан 3 жыл ішінде Орталық Азия елдерінен 62 стартап акселерация бағдарламасынан сүрінбей өтті. Алдыңғы лек түлектері 26 млн доллардан астам инвестиция тартты, ал бұл компаниялардың жалпы бағасы 425 млн долларды құрады. Олар БАӘ, Түркия, АҚШ және басқа елдердің нарығына шыға алды. Бұл серіктестік стартаптарымыз үшін халықаралық алаңға жол ашып, жаһандық нарықты бағындыруға берік негіз болатынына сенімдіміз. Біз стартап-экожүйесін дамыту мақсатында әлемдік жетекші компаниялармен ынтымақтастықты нығайта береміз», деді Astana Hub бас директоры Мағжан Мәдиев.
Бесінші лек қатысушылары өз жобалары мен жетістіктерін «Demo Day» іс-шарасында таныстырды. Бағдарламаның жарқын жетістігінің бірі шағын және орта бизнесті цифрландырумен айналысатын «Beksar» стартабы болды. Акселератор барысында компания кірісін 3 есе арттырып, MRR көрсеткішін 75 000 долларға жеткізген.
«Silkway Accelerator» бағдарламасына қатысқанымыз қаржылық көрсеткішімізді және операциялық үдерісімізді едәуір жақсартты. Сондай-ақ тұтынушылардың кетуін 70%-ға қысқарттық, бұл сапаны бақылау жүйесін енгізу арқылы жүзеге асты. Бағдарлама аясында масштабтау стратегиясын нақтылап, Өзбекстан мен Қырғызстанда өкілдіктер аштық. Бұған қоса Орталық Азия, Әзербайжан және Грузия нарықтарын әрі қарайғы даму бағыты ретінде таңдадық», деді «Beksar» компаниясының негізін тең қалаушы Мақсат Бектібаев.
Ал «Checkdoc.kz» стартабы ай сайынғы кірісін 20 есе арттырып, 46 миллион теңгеге келісімшарттар жасасты. «Біз команда құрамын қайта жасақтап, оны негізгі мамандармен бекіте түстік. B2B нарығына шығып, медицина мен сақтандыру саласында ірі келісімдерге қол қойдық. Сондай-ақ жақын арада «Checkdoc Digital Insurance» атты жаңа өнімді іске қосуды жоспарлап отырмыз, бұл қызметкерлерге сақтандыру қызметтерін жедел басқаруға мүмкіндік береді», деді жобаның бас директоры Ақтоты Сматова.
Акселерацияны сәтті тәмамдағандар қатарында бірнеше отандық жоба бар. Атап айтсақ, мектеп оқушыларына арналған оқыту платформасы «ab.ai»; алақанның көмегімен авторизациядан өтуге, кез келген жерге кіруге және түрлі затқа төлем жасауға мүмкіндік беретін «Alaqan» жобасы; жүк тасымалдауды экспедиторлау бойынша ең ірі онлайн-платформа «biny.co»; жасанды интеллектіні қолдана отырып, онлайн курстар ұсынатын «Courstore SaaS»; маркетплейстерде сату үдерісін автоматтандыруға арналған «Prometei»; кәсіптік бағдар беруге және университетке түсуге арналған ЖИ негізіндегі «WeGlobal.ai» платформасы; сондай-ақ мейрамханаға арналған тапсырыстар мен төлемдерді басқаратын «kook» жобасы бар.
Халықаралық қатысушылар қатарында Моңғолия мемлекетінің жобасы көш бастады. Атап айтсақ, «Lambda Global» компаниясы қашықта жұмыс істейтін мамандармен ынтымақтастық орнатуға арналған платформа құрды. Сондай-ақ Қырғызстанның ЖИ негізіндегі бағдарламашыларға арналған жұмыс симуляторы «Neobis» болды. Бұдан бөлек, өзбекстандық екі стартап ерекше көзге түсті. Соның бірі – «AL-Chiroq». Бұл – ұялы байланыс операторының бағдарламаларына арналған платформа. Екіншісі – жылжымайтын мүлік индустриясына бағытталған цифрлық экожүйені ұсынатын «UYSOT» компаниясы.
Жүзден жүйрік деп танылған стартап иелері өз жобаларын таныстырып, алдағы жоспарларын талқылаған дәстүрлі «Opening Day» іс-шарасына Цифрлық даму, инновациялар және аэроғарыш өнеркәсібі министрі Жаслан Мәдиев қатысқан еді.
«Кәсіпкерлер мен стартаптарға арналған мұндай ауқымды әрі маңызды бастама үшін серіктестеріміз бен «Google for Startups» компаниясына алғыс айтқым келеді. Бағдарламаның жетістіктері баршылық. Атап айтсақ, 1 300-ден астам жедел іске қосылған жоба, 400 миллион доллардан астам сомаға бағаланған 50-ге жуық стартап, сондай-ақ қатысушылар тартқан 26 миллион доллар көлеміндегі ортақ инвестиция. Бұл – аталған бағдарламаның ауыз толтырып айтарлықтай үлкен нәтижесі әрі бастамасы ғана. Министрлік тарапынан мұндай жобаларға қолдау көрсетіп, ұйымдастыруға қажетті барлық инфрақұрылымды қамтамасыз етуге дайынбыз», деді министр.
«Silkway Accelerator» бірлескен бағдарламасының тиімділігі мен өнімділігін ескере отырып, «Google for Startups Astana Hub»-пен серіктестігін жалғастырады. Айта кетейік, «Google for Startups» – 2011 жылы «Google» корпорациясы іске қосқан стартап бағдарламасы. Бұл 125 елдегі 50-ден астам акселераторды қамтып, технологиялық кәсіпкерлерге тәжірибе сабақтарын ұсынады.