Халық арасында Жамбыл облысындағы таулы жерде орналасқан Көккөл туралы түрлі аңыз бен миф тарап кеткен. Желіде жарияланған видеода Көккөлде жылан тәріздес Лох-Несс құбыжығы мекендейтіні айтылады, деп хабарлайды Egemen.kz Stopfake.kz-ке сілтеме жасап.
Ежелгі тіршілік иесінің дене ұзындығы 15 метрге жетеді. Уфологтардың пікірінше, құбыжық көл түбіндегі үңгірлерде жасырынады. Ал су айдынында құбыжықтың барын қырылдаған дыбыстардан және судың шалпылдағанынан байқауға болады екен. Ғалымдардың айтуынша, келтірілген мәліметтер шындыққа жанаспайды.
Көккөл өзінің ерекше физикалық қасиеттеріне байланысты Қазақстанның аномальды аймақтарының тізіміне енген. Мұндағы су әрдайым таза, бірақ көлге ешқандай өзен құймайды, Көккөлдің суы да ешқайда ақпайды. Тағы бір ерекшелігі – суда шұңқырлар және ұзын жолақты толқындар пайда болады. Бұл су астында ұзын аң жүзіп келе жатқандай әсер қалдырады.
Әртүрлі елдердің гидрологтары Көккөлге көптен бері қызығушылық танытып, зерттеулер жүргізіп, Көккөлдің мұздақтардан және тау жыныстарының мореналық қыртыстар қабатында пайда болғанын анықтады. Морена – геологиялық шөгінділер. Жай сөзбен айтқанда, әртүрлі сынық материалы. Бұл – үлкен тастар және ұсақ тастар.
Мореналарда каналдар, шұңқырлар, су астындағы үңгірлер пайда болуы мүмкін. Су ауада сіңірілген кезде, оғаш уілдеген дыбыстар, шұңқырлар пайда болады.
Көккөл – тылсым күшке толы жер. Десе де, онда құбыжық мекендемейді. Гидролог ғалымдар су бетіндегі оғаш дыбыстарды, шұңқырлар мен толқындарды оның пайда болуымен байланыстырады.