Жыл аяғына дейін елорда мектептерінде жаңа 5 инклюзияны қолдау кабинеті ашылады. Барлығы, бұған дейін іске қосылғандарды есептегенде, тиісті 10 кеңістікті Астанадағы мектепте оқитын ерекше балалардың 10 пайызы қолдана алмақ.
Оқу жылына орай есігін айқара ашқан бас қаладағы 5 инклюзия кабинеті нәтижесінде 150-ден астам мүгедектігі бар бала қатарластарымен бірге мектепте оқып жатыр. Жаңа сипаттағы сыныптар бұған дейін сол жағалаудағы №22 мектеп-гимназияда, №36 орта мектепте, К.Мыңбаев атындағы №59 мектеп-лицейде, Ә.Бөкейхан атындағы №76 мектеп-лицейде және №97 мектеп-гимназиясында табысты жабдықталды. Енді мемлекеттік стандартқа сай, қор мен сарапшылар тарапынан жетілдірілген тың үлгідегі инклюзия кабинеттері желтоқсан айында Есіл өзенінің оң жағасындағы №32, 52, 61, 65, 90 мектептерде ашылмақ. Осылайша, ерекше қажеттілігі бар тағы 238 бала ой-санасын кеңейтіп, дамуға мүмкіндік алады. Барлық мектепте әр балаға дербес бағдарлама қарастырылып, мұғалімдерге бір жыл бойы әдістемелік қолдау жасалады.
«Барша тарапты Астана қаласында инклюзияны қолдау кабинеттерінің санын 10-ға жеткізуге белсенді атсалысуға шақырамыз. Мәселен, ірі компаниялар қоғамдағы краудфандинг бастамаларына қосылып, жарна жасау арқылы қоғам мен бизнес үндестігіне қадам жасай алады. Осылайша бизнес өкілдері sk-trust.kz сайтындағы QR код немесе есепшот деректемесі арқылы қайырымдылық бастамаларды қолдаса, құба-құп. Сәйкесінше, кәсіпкерлер қоғаммен байланысын жақсартып, әлеуметтік жауапкершілігін нығайта түседі. Әрі бұл қадам қоғамда қайырымдылық мәдениетін дамытуға ықпал етеді», дейді «Samruk-Kazyna Trust» КҚ бас директоры Альфия Адиева.
Сонымен қатар таяуда, Республика күніне орай қор қолдауымен Ақмола облысының 4 бірдей ауылында инклюзия бөлмесінің тұсауы кесілді. Өңірдің ауылдық жерлеріндегі ерекше балалардың сапалы білім алуына жағдай жасауда инклюзия кабинеттері Оразақ, Қызылжар, Қараменді, Ы.Алтынсарин ауылдарында қолданысқа берілсе, тағы біреуін алдағы уақытта Көкшетау қаласында пайдалануға тапсыру жоспарланып отыр. Жалпы сомасы 87,3 млн теңгені құрайтын 5 инклюзия кабинетінің жұмысы нәтижесінде кем дегенде мектепке, балабақшаға баратын, үйден оқып келген мүгедектігі бар 120 бала қамтылады.
Қор биылғы компаниялар тобындағы еңбек адамдарына арналған корпоративтік шаралардан түскен қайырымдылық қаражатын да инклюзия кабинеттеріне бағыттамақ. Мәселен, «Samruk-Kazyna Trust» КҚ ұйымдастыруымен «Самұрық-Қазына» АҚ компаниялар тобының кәсіпорындары арасында өткен «SK Әзіл Fest» көңілді тапқырлар қайырымдылық кешінен түскен қаржыға кем дегенде бір инклюзия кабинетін ашу межеленіп отыр.
Алдаберген КЕМПІРБАЙ