Қордай ауданындағы шекара қызметіне әскер қатарына шақырылған сарбаздардың ант қабылдау рәсімі өтті. Күзгі шақырылым аясында Отан алдындағы қасиетті борышын өтеуге келген сарбаздар салтанатты түрде ант берді, деп хабарлайды Egemen.kz тілшісі.
Сарбаздар үшін аса маңызды іс-шараға олардың туыстары мен достары, әскери бөлім командирлері қатысты. Осылайша, олар жас ұландарға қолдау көрсетті.
Кезекті шақырылым сарбаздары ел шекарасының күзетін қамтамасыз ететін Қордай шекара басқармасының қатарына қосылды. Қазақстанның оңтүстік бөлігінде орналасқан бұл аймақ шекара қауіпсіздігін қамтамасыз етуде ерекше маңызға ие. Шекара қызметі әрбір жас сарбазға зор міндет жүктеп, оған үлкен жауапкершілік артады. Ант беру рәсімі осы міндеттің символдық бастауы іспетті. Бұл күні сарбаздар Отан алдындағы жауапкершілігін терең сезініп, тәуелсіздік пен бейбітшілікті сақтау жолындағы қызметке шын жүректен дайын екендіктерін жеткізді.
Жас жауынгерлер ант қабылдағаннан кейін бірден әскери дайындық бағдарламасына қосылды. Әскери бөлімде олар тактикалық және физикалық даярлықтан өтіп, шекара күзету ісінің қыр-сырын меңгеруге кіріседі. Әскери өмірдің әрбір сәті шыдамдылық пен шыңдалуды талап етеді. Сарбаздар шекараны қорғау ісіне қажетті дағдыларды меңгеріп, әрдайым қырағылықты сақтауды үйренеді. Олардың әрқайсысы – еліміздің тыныштығы мен тәуелсіздігін қорғауға арналған маңызды тетіктің бір бөлшегі.
Жамбыл облысының Қордай ауданында өткен ант қабылдау рәсімінде жалпы саны 321 сарбаз әскери ант берді. Күзгі шақырылым аясында Қазақстанның ұлттық қауіпсіздігін қамтамасыз ету жолында өздерінің алғашқы қадамдарын жасаған олардың жүзінен шаттықтың табы есіп тұрды.
Ант қабылдау рәсіміне Қазақстан Республикасы Ұлттық қауіпсіздік комитетінің шекара қызметі Жамбыл облысы бойынша департаментінің бастығы, полковник Ғани Бекмырзаев арнайы қатысып, жас сарбаздарға сәттілік тіледі. Ол өз сөзінде әскер қатарына қосылған жауынгерлердің еліміздің шекаралық қауіпсіздігін қамтамасыз етудегі маңызды рөлін атап өтіп, олардың Отан алдындағы қасиетті борышын абыроймен өтеулеріне сенім білдірді.
Жамбыл облысы