Петропавл қаласының әкімі Серік Мұхамедиевтің өкімімен Петропавл қаласы әкімінің құрылыс және жедел мәселелер жөніндегі орынбасары болып Сергей Мелехов тағайындалды, деп хабарлайды Egemen.kz.
Сергей Мелехов 1987 жылы Аққайың ауданы Смирнов ауылында дүниеге келді.
М.Қозыбаев атындағы СҚМУ-ді «Дене шынықтыру және спорт» мамандығы бойынша, С.Сейфулин атындағы Қазақ агротехникалық университетін «Электр энергетигі» мамандығы бойынша тәмамдаған.
Конькимен жүгіруден ҚР спорт шебері, жоғары санатты жаттықтырушы.
Еңбек жолын 2007 жылы конькимен жүгіру спортынан нұсқаушы-спортшы қызметінен бастады. Әр жылдары СҚО әкімдігінің ведомстволық бағынысты мекемелерінде, «Астанаэнергосервис» АҚ техникалық бақылау және жобаларды басқару инженері қызметінде жұмыс істеді.
2018-2020 жылдары Петропавлдағы «Жеңіс» балалар мен жасөспірімдерге мамандандырылған олимпиадалық резервтегі спорт мектебіне жетекшілік етті.
Осы тағайындауға дейін Сергей Мелехов СҚО әкімдігі дене шынықтыру және спорт басқармасының басшысы қызметін атқарды.
Сондай-ақ 2024 жылғы су тасқыны кезеңінде Хромзавод шағын ауданының жедел штабын басқарды.