Елордадағы Орталық саябақта шаңғы тебу маусымы ашылды. Осының құрметіне қала тұрғындары мен қонақтары шаңғыдан өткен жарысқа қатысты.
Бұл күні орталық стадионға 300-ге жуық адам жиналды. Саябаққа ағылғандардың барлығы дерлік құр келмей, шаңғысын ала келіпті. Жас-кәрі түгел жүр. Үлкен-кіші өздерінің жас ерекшеліктеріне сәйкес 500 метр, 2,5 км қашықтықта бақ сынады. Соңында балалар, жастар, ересектер арасындағы мықтылар іріктеліп, жүлделер бөлек-бөлек үлестірілді. Көпшіліктің ортасында жүрген Астана қаласы әкімдігінің «Спорттық-бұқаралық іс-шараларды өткізу дирекциясы» спорттық-бұқаралық іс-шараларды жоспарлау бөлімінің басшысы Көлбай Жанбекті әңгімеге тартып, пікірлескенімізде, ол қазіргі ауа райы шаңғы тебуге таптырмайтынын айтты.
«Биылғы қыс шаңғы жарысын өткізуге өте ыңғайлы. Шаңғы маусымының ашылуын осы уақытқа жоспарлаған себебіміз – ауа райына байланысты. Қардың қалыңдығы шаңғы жолын жоғары деңгейде жасауға мүмкіндік беріп отыр. Шаңғы – қысқы спорт түрлерінің арасында ең танымалдарының бірі. Астанада шаңғымен айналысатын тұрғындардың саны өте көп. Бүгін де шаңғы маусымының ашылуына шаңғыға баладан еңкейген қарияға дейін қатысып жатыр. Ең қарт қатысушымыздың жасы – 83-те. Шаңғы жарысынан бөлек, шаңғы маусымының ашылуында белбеу күресі, қол күресі, арқан тартыс, кір тасын көтеру бәсекесінен сайыс ұйымдастырылды», дейді Көлбай Жанбек.
Шаңғы маусымына ата-анасымен келген ең жас қатысушыларының бірі, Кеңшілік Ахмат қазір 9 жаста.
«Шаңғы маусымына адам көп жиналыпты. Балалар да аз емес. Негізі өзім жүзумен айналысамын. Ал қыс мезгілінде шаңғыға ден қоямын. Шаңғымен шұғылданғаныма жылдан асып қалды. Соның арқасында төзімділігімді арттырдым. Спортта жетістікке жетсем, оның өміріме де септігін тигізетініне сенімдімін. Сондықтан жыл сайын ата-анаммен бірге шаңғы тебуге келуге тырысамын», дейді кішкентай шаңғышы.
Шаңғы маусымының ашылуында жарысқа қатысқан қала тұрғындары 7 жас санаты бойынша сынға түсті. Мәре сызығын алғашқылардың бірі болып кесіп, жүлдеге іліккендер медаль, бағалы сыйлықтармен марапатталды. Осылайша, қала тұрғындары тағы бір күнді шат-шадыман көңіл күйде өткізді.