Ақтөбе облысында екі көлік соқтығысып, салдарынан біреуі көпірден құлап кеткен, деп хабарлайды Egemen.kz.
Желіде көліктің көпірден құлаған видеосы пайда болды. Мәліметтер бойынша, көлік шамамен төрт метр биіктіктен құлаған.
Ресми мәлімет бойынша, 27 желтоқсанда Ақтөбе-Астрахань тас жолының Алға қаласына жақын бойында ВАЗ-2114 пен Toyota Sienna көлігінің қатысуымен жол апаты болған. Соқтығыс салдарынан ВАЗ-2114 көлігі көпірден құлаған. Осы көліктің жүргізушісі мен жолаушысы түрлі дене жарақаттарымен ауруханаға жеткізілген.
«Аталған жол-көлік оқиғасы бойынша сотқа дейінгі тергеу басталды. Полиция департаменті мұндай оқиғалардың алдын алу үшін жол қозғалысына қатысушылардың, әсіресе көлік қозғалысы көп жерлерде жүру ережелерін сақтауы маңызды екенін еске салады», делінген хабарламада.