Оқырмандар қолына өлкетанушы Қуаныш Ормановтың «Ел мен жер және тұлғалар тарихы» атты кітабы тиді. Осы кітаптың алғашқы беттерін парақтағанда-ақ, басқаны былай қойғанда, қостанайлық оқырман «Қостанай-Торғай өлкесінде метеориттің түсуінен пайда болған көлдің бар екенін, қайыңның еш жерде жоқ «табантал» деген түрінің, биіктігі 35-40 метрге, діңі 1,5 метрге жететін балқарағайдың өсетінін, көшпелі құмдар, Торғай даласындағы космостан түсірілген суреттер секілді табиғат тамашалары мен тылсымдарын қалай білмегенмін?» деп таңғалары анық.
Кітап өлкенің табиғатымен шектелмейді. Біздің дәуірімізге дейінгі және жаңа дәуірден бүгінге дейінгі тарихта осы өңірдің мол үлесі жөнінде нақты деректерді алға тартады. Әлемге әйгілі арғы-бергі тарихшы ғалымдардың еңбектеріне сүйене отырып, Торғай даласы мен Тобыл өңірінің Нұқ пайғамбардың Иафес деген ұлынан тарайтын ұрпақтарының мекеніне айналғанын жазады. Қостанай қаласы түбінен табылған «Тобыл ойшылы» аталып кеткен тас мүсін әлі құпиясын аша қойған жоқ. Кітап оқырманын осындай қызықты танымдық деректермен жетелеп отырады.
Автор оқырмандарға Қостанай-Торғай өңірінен шығып, елге тұтқа болған тұлғалар мен бүгінгі ұрпақ есімдерін естісе де терең білмейтін, тіпті, аты-жөні осы кезге дейін ескерусіз қалған туған жер түлектері туралы да баяндайды.
– Туған елдің, туған жердің тарихы мені жас кезімнен қызықтырды. Бала кезімде өзім өскен Жітіғара, Қамысты аудандарының ой-қырын, кейінгі жылдары Торғай өңірін жаяу араладым. Керемет дүниелер Жоғары Тобыл су қоймасының астында қалды, – деп кітап авторы тұсаукесер жиында көптеген қызықты мысалдар келтірді. Кітаптың ғылыми жағына тарихшы-жазушы Қойшығара Салғарин жетекшілік етті. Осы туындының тұсаукесерін ұйымдастырған облыстық ішкі саясат басқармасының басшысы Ж.Мақанов алдағы уақытта бұл еңбек облыстағы мектептер мен кітапханаларға таратылатынын айтты.
Нәзира ЖӘРІМБЕТОВА,
«Егемен Қазақстан».
ҚОСТАНАЙ.