Ақмолада Беларусь техникалары құрастырылуда

Ақмола облысына Беларусь Республикасы Өнеркә­­­сіп ми­нистрлігінің сыртқы эконо­микалық қызмет басқармасының басшысы Владимир Волчок бастаған бір топ беларусьтік іс­кер азаматтар келді. Беларусьтіктердің өңірге са­парының басты мақсаты Еура­зия­лық экономикалық одақ аясын­да құрылған «Ауыл шаруа­шылығы және коммунал­дық техникаларының Қазақстан-Беларусь индустриялық-техно­логиялық паркі» инвес­­ти­циялық жобасын жүзеге асыру барысымен танысу және алдағы жоспарларын талқылауға арналды. Аталған жоба 2012 жылы қолға алына бастады. Мұнда­ғы мақсат Беларусь елінің ком­мунал­дық және ауыл шаруа­шы­лы­ғы саласы­ның озық техникаларын елімізде құрастырып, екі ел арасындағы сауда-эконо­микалық байланыс­ты нығайту болып табылады. Жобаның бірін­ші кезеңін жүзеге асыру үшін 2014 жылы Беларусь елі­нің «Минск трактор зауыты» ашық акционерлік қоғамы және отан­дық «Қазақстанның агроин­новациялық корпорация­сы» жауапкершілігі шектеулі серіктес­тігі бірлесіп, «МТЗ-ҚАИК» се­ріктестігін құрған болатын. Ал өткен жылы аталған жобаны Индустрияландыру картасына енгізу үшін облыс әкімдігінің жанындағы өңірлік үйлестіру кеңесінің шешімімен қолдау тауып, Индустрияландыру картасына енгізілді. Сондай-ақ, сумен, электр қуатымен жабдықтау, кәріз және жылу жүйесі тәрізді инфрақұрылымды тарту мәселесі де оң шешімін тапқан. Жалпы, беларусьтік компа­нияның Ақмола облысымен іскерлік байланысы 2010 жылдан бастау алады. Осы аралықта 5 миллионға жуық АҚШ долларына 7 түрлі техниканың 500 данасы құрастырылып шы­ғарыл­ған. Бұлар негізінен отан­дас­тарымыз тарапынан сұраныс­қа ие коммуналдық және ауыл­шаруашылық техникалары болып табылады. «Қазақстан біздің стра­тегия­лық әріптесіміз. Мұнда Бела­русь өнімдеріне сұраныс жоғары. Осындағы индустрия­лық-тех­нологиялық парк осы бағыт­та бірлесе істеп жатқан жұмыс­тарымыздың жемісі. Сондықтан, ал­дағы уақытта өнім көлемін арт­тыру жоспарда бар. Бұл екі жаққа тиімді екендігі сөзсіз», дейді Беларусь Республикасы Өнер­­кәсіп министрлігінің сырт­қы экономикалық қызмет басқар­ма­сының басшысы Владимир Волчок. Бақберген АМАЛБЕК, «Егемен Қазақстан». Ақмола облысы.