Биыл Ақмола облысында ауыл шаруашылығы дақылдарының егіс алқабы 5,4 млн гектардан асады, бұл 2024 жылмен салыстырғанда 48,1 мың гектарға көп, деп хабарлайды Egemen.kz.
Майлы дақылдардың алқабы – 161 мың гектарға артып, 2025 жылы 430 мың гектарды құрайды. Сондай-ақ, картоп пен көкөніс егістігі кеңейтілді. Ал, мал азығы дақылдарының алқабы 2024 жылғы деңгейде сақталды – 416 мың гектар.
Тұқым дайындау жұмыстары толық аяқталды. 540,2 мың тонна тұқымның 444,4 мың тоннасы (жоспарланған көлемнің 82,3%) тексерілген.
Бұдан бөлек, минералды тыңайтқыш енгізілетін алқап 78 мың гектарға ұлғайтылмақ. Отандық өндірушілермен 66,9 мың тонна тыңайтқыш жеткізуге 266 келісімшарт жасалған.
Техника дайындық деңгейі 100%-ды құрайды. Егіс жұмыстарына 37 мың бірлік техника жұмылдырылады.
Ауыл шаруашылығы министрлігінің мәліметінше көктемгі дала жұмыстарына 82,9 мың тонна жеңілдетілген дизель отыны бөлінді. Биыл ақпан-наурыз айларында ауыл шаруашылығы тауарын өндірушілер үшін отынның бағасы литріне 254 теңгені құрады, бұл нарықтық бағадан 15%-ға төмен.
Үкіметтің қолдауының арқасында көктемгі егіс жұмыстары үшін ерте қаржыландыру қамтамасыз етілді. «Кең дала» бағдарламасы шеңберінде жеңілдетілген несие алу үшін жалпы сомасы 96,5 млрд теңгеге 606 өтінім түсті, оның ішінде 65,9 млрд теңгені құрайтын 413 өтінім мақұлданып, қаржыландыру кезеңінде тұр.