Кандидат ретінде тіркеді

Кеше Әбілғазы Қалиақпарұлы Құсайыновты Қазақстан Республикасының президенттігіне кандидат ретінде тіркеу мәселесі жөнінде Орталық сайлау комиссиясының отырысы өтті, деп хабарлады Орталық сайлау комиссиясының баспасөз қызметі. Орталық сайлау комиссиясына «Қа­зақстан Республикасындағы сайлау туралы» Қазақстан Республикасы Конс­­ти­туциялық заңының 59-бабы 6-тар­мағына сәйкес мынадай құжаттар ұсынылды: Ә.Қ.Құсайыновтың Қазақстан Рес­­публикасының президенттігіне кан­ди­дат ретінде дауысқа түсу ниеті туралы өтініші; Ә.Қ.Құсайыновтың өмірбаяндық деректері; Ә.Қ.Құсайыновты қолдап жи­нал­ған азаматтардың қолдарын тексеру нәтижелері туралы аумақтық сайлау комиссияларының хаттамалары; Кандидат пен оның зайыбының табысы және мүлкі туралы декларация тапсырғаны туралы салық органының анықтамасы; Кандидаттың сайлау жарнасын енгiзгенiн куәландыратын құжат. «Қазақстан Республикасындағы сайлау туралы» Конституциялық заңның 56-бабы 2-тармағына сәйкес президенттiкке кандидатты республика облыстарының, республикалық маңызы бар қаласының және астанасының кемінде үштен екi­сiнiң атынан теңдей өкiлдiк ететiн сай­лау­шылардың жалпы санының кемін­де бiр пайызы қолдауға тиiс. Ә.Қ. Құсайы­новтың кандидатурасын қолдап сайлау­шылардың 132 152 рас қолы жиналды. Ұсынылған құжаттарды қарап, Қа­зақстан Республикасы Орталық сайлау комиссиясы Әбілғазы Қалиақ­пар­ұлы Құ­сай­ыновты Қазақстан Респуб­лик­а­сының пре­зи­денттігіне кандидат рет­інде тіркеу туралы шешім қабыл­дады. * * * Сондай-ақ, кеше Орталық сайлау комиссиясының отырысы болды. Онда Хасен Кәрімжанұлы Қожа-Ахметтің Қазақстан Республикасының Конституциясы мен «Қазақстан Республикасындағы сайлау туралы» Конституциялық заңында Қазақстан Республикасының президенттігіне кандидаттарға қойылатын талаптарға сәйкестігін белгілеу және оған кандидатурасын қолдап қолдар жинау үшін қол қою парақтарын беру туралы қаулы қабылданды. Президенттікке кандидатты қолдап қолдар жинауды сенім білдірілген адамдар ұйымдастырады. Қолдарды жинайтын топтардың саны мен құрамына шек қойылмайды. Президенттікке кандидатты қолдап толтырылған қол қою парақтары аумақтық сайлау комиссияларына тапсырылады, олар бес күн мерзім ішінде паспорт қызметінің қызметкерлерін қатыстыра отырып, қойылған қолдардың растығын тексеруді жүзеге асырады, тиісті хаттаманы ресімдейді және оны Орталық сайлау комиссиясына жолдайды.  «Егемен-ақпарат».