«Біз сот төрелігін жүзеге асырудың сапасын жақсартумен ғана шектелмей, сот отырыстарының жариялылығы мен қолжетімділігін қамтамасыз етуіміз қажет. Ең басты міндетіміз – өз арамызда жемқорлыққа қарсы батыл күрес жүргізіп, арамыздағы кәсіби шеберлігі төмен, адамгершілік-моралдық бейнесі күмәнді адамдардан арылту» деп мәлім етті сот органдарындағы жетістіктер мен кемшіліктерді саралаған кеңесте Атырау облыстық сотының төрағасы Мұхтар Смағұлов.
Төрағаның мәлім етуінше, былтыр өңір соттарында 27175 іс қаралыпты. Оның ішінде 1995-тен астамы азаматтық, 1507 қылмыстық, 23673-тен астам әкімшілік құқық бұзушылық істері бар екен. Судья медиаторлардың қарауына 706 іс берілген. Сот шешімдерін шығарған кезде бас бостандығынан айырмай жаза тағайындаудың үлес салмағы көбейе түсуде. 9 адамға қатысты ақтау үкімі шығарылған.
– Сонымен бірге, былтырғы жылдың шілдесінен бері қолдарында цифрлы электронды қолтаңбалары бар азаматтарға «Сот кабинеті» арқылы талап арыздарын, сот отырыстарының хаттамалары мен хаттамаларға ескертулерді, ұсыныстарын жіберуге, электронды көшірмелерді алуға мүмкіндік туды. Осы жоба аясында, яғни «Сот кабинеті» арқылы 2442 электронды талап арыз, 9 хаттамаға ескерту, 902 хаттаманың көшірмесін алуға өтініш, 56 электронды шағым секілді барлығы 30409 өтініш келіп түсті, – деді облыстық соттың төрағасы.
Жолдасбек ШӨПЕҒҰЛ,
«Егемен Қазақстан».
Атырау облысы.