Ерке Ертісті жағалай жайлаған Күршім ауданында құсбегіліктің II облыстық чемпионаты өтті. Екі күн қатарынан Топтерек ауылының аспанында қыран қалықтап, құс көтергендер мәре-сәре болысты.
Айта кетейік, ауқымды жарысты облыстық дене шынықтыру және спорт басқармасы мен Күршім ауданының әкімдігі ұйымдастырды. Дүбірлі додаға Өскеменнен, Зайсан, Ұлан және Үлкен Нарын аудандарынан ең үздік деген құсбегілер жиналды. Сайысқа ұзын саны 25 бүркіт пен 6 ителгі қатысты.
Қыран құс көкке самғап барып, төмен шүйілгенде жиналған жұрттың қиқуы күшейеді. Төменде жортқан қоянға да жан керек, жалтақтай қашады. Тегеуріні күнге шағылысып, өткір жанары жылт еткен тышқанды байқайтын бүркіт орғи қашқан қоянды қойсын ба? Кеше жауған ұлпа қардың бетінен іле жөнеледі.
Нәтижесінде, Ұлан ауданының намысын қорғаған Горький Нажитбан жеңімпаз атанып, 1-орынды иеленді. 2-орын Зайсан қаласынан келген Ақынбек Төлепбергенге бұйырды. Ал 3-орынды кішкентай бүркітші қыз Айзере Нажитбан қанжығасына байлады. Құсбегілер бүркіт салу ғана емес, қолға шақыру және шығарға салудан да жоғары шеберлік көрсетті.
Ал ителгі ұшырудан Өскеменнен келген Самғат Ердана алтын жүлде иеленді. 2-орын Күршім ауданының бүркітшісі Айдос Жандыкеевке берілді. 3-орынды Зайсан қаласынан келген Төлепберген Боранбай еншіледі. Барлық жеңімпаздар мен жүлдегерлер тиісті дәрежедегі медальдармен және грамоталармен марапатталды.
Республикалық «Құсбегілік» федерациясының регламентіне сай өткен бұл турнир өңірдегі саятшылық өнерін жаңғыртудың жарқын үлгісі болды. Шарада қатысушылардың қауіпсіздігіне баса назар аударылып, медициналық қызмет пен жол полициясының сүйемелдеуі толық қамтамасыз етілді. Топтерек ауылындағы бұл дода ұлттық рухты асқақтатып, өскелең ұрпақты ата кәсіпке баулуда маңызды рөл атқарды.
Шығыс Қазақстан облысы,
Күршім ауданы