АСТАНА. 25 ақпан. Еврочеллендж турнирі аясында «Астана» баскетбол командасы өз алаңында бельгиялық «Окапи Аллстарды» 77:73 есебімен жеңді. Бұл туралы egemen.kz хабарлады.
Қаңтар айының соңында Бельгияда өткен ойында «Окапи Аллстар» астаналықтарды 108:85 есебімен ойсырата жеңген еді. Сондықтан бұл ойында қазақстандық команда есе қайтару үшін аянып қалмады. Алғашқы кезең 20:13 есебімен астаналықтардың пайдасына аяқталды. Тең жағдайда өрбіген келесі кезеңде де «Астана» бір ұпай басымдығымен жеңіске жетті (22:21). Нәтижесінде, қос кезең қорытындысы бойынша алаң иелері 42:34 есебімен алға шықты. Үшінші кезеңде «Астана» 18 ұпай жинаса, бельгиялықтар 16 ұпаймен жауап қайтарды. Ал соңғы шешуші кезеңде қонақтардың қарқыны күшті болды. Десек те, олар 23:17 есебімен кезеңді өз пайдаларына аяқтағанымен, жалпыесепте есе жіберуге мәжбүр болды.
Осылайша «Астана» турнирдің топтық кезеңінде өткізген алты ойыннан 9 ұпай жинады. Алайда, бұл көрсеткіш Рамунас Бутаутас жаттықтыратын командаға сайыстың плей-офф кезеңіне шығу үшін жеткіліксіз болды. Себебі, соңғы турда топтағы басты қарсыласымыз италиялық «Бриндизи» командасы да жеңіске жетіп, 9 ұпай олжалады. Италиялықтар сырт алаңда Румынияның «Энергия Ровинари» командасынан 78:67 есебімен басым түскен еді. Нәтижесінде, доп айырмасы бойынша «Бриндизи» екінші орынға табан тіреп, келесі кезеңге берілер жолдамаға ие болды. Бірінші орынға 6 ойыннан 10 ұпай жиған румыниялық команда жайғасты. Ал «І» тобында үшінші орын алған «Астана» жарысты аяқтауға мәжбүр болды.
Еламан Қоңыр.
Дерек: egemen.kz.
Сурет: bcastana.kz.