Қарағандыда өткен облыстық жекпе-жек жарысынан кейін 18 жастағы Арслан Атымтаев жансақтау бөліміне түсті. Жас спортшының туыстары турнир ұйымдастырушыларының әрекетіне наразылық білдіріп, полицияға арыз жазды, деп жазады Egemen.kz КТК телеарнасына сілтеме жасап.
18 жастағы Арслан Атымтаевқа миына күрделі ота жасалған. Алайда оның жағдайы әлі де ауыр күйінде қалып отыр.
Спортшының туыстары құқық қорғау органдарына жүгініп, қылмыстық іс қозғалды. Олар жауапкершілікті Арсланның қарсыласына емес, турнир ұйымдастырушыларына жүктеу керек деп есептейді.
Арсланның апасы Бақытжан Қалиеваның айтуынша, жекпе-жек кезінде тыйым салынған әдіс қолданылғаны туралы ескертулер болған. Оның сөзінше, спортшы басымен құлаған сәтте төрешілер жекпе-жекті дереу тоқтатып, оның жағдайын тексеруі тиіс еді.
«Бала басымен құлаған кезде олар жекпе-жекті тоқтатып, жағдайын бағалауға міндетті болатын. Алайда ұйымдастырушылар, жаттықтырушы мен төрешілер жауапкершіліктен жалтарып отыр», дейді ол.
Туыстарының айтуынша, жедел жәрдем шақырылмай, спортшыны ауруханаға жеке көлікпен жеткізген. Соның салдарынан медициналық көмек дер кезінде көрсетілмеді деп санайды олар. Сонымен қатар, жеткізілген медициналық мекемеде нейрохирург болмаған. Маманды басқа клиникадан күтіп, операция жасауға шамамен үш сағат кеткен.
Ал жарыс ұйымдастырушылары барлық әрекет регламентке сәйкес жүргізілгенін айтып, кінәні мойындамай отыр. Қарағанды облыстық жекпе-жек федерациясының президенті Әділет Нұрмадиев бұл әдіс тыйым салынған тәсілге жатпайтынын мәлімдеді. Оның айтуынша, бас төреші жекпе-жекті Арслан тарапынан белсенді әрекет болмағандықтан тоқтатқан.
Хромтауда газ жарылды: 5 адамды күйік шалды, бір адам жансақтау бөлімінде жатыр
Қазіргі таңда қылмыстық іс қозғалды. Заң бойынша жауапкершілік спортшының қарсыласына жүктелуі мүмкін. Алайда жәбірленуші тарап жаттықтырушы мен төрешілердің де әрекетіне құқықтық баға беруді талап етіп отыр.
Алматы-2 теміржол бекетінде 52 адам табиғи газдан уланды: екі бала жансақтау бөлімінде