Бурабайға зубрлар әкелінді

«Бурабай» мемлекеттік ұлттық табиғи саябағы Беларусь Республикасынан әкелінген жабайы өгіздермен, яғни зубрлармен толықты. «Беловеж нуы» ұлттық сая­ба­­ғынан жеткізілген екі-төрт жас ара­лығындағы 10 жабайы зубр­ды­ «Орман шаруашылығы» жа­уап­кершілігі шектеулі се­­рік­тестігі өздерінде өсіріп, жер­сін­ді­ру үшін сатып алған. Олардың үшеуі – аталық, жетеуі – аналық. Алдағы уақытта бұл жануарлардың саны көбейтілген соң, «Бурабай» мемлекеттік ұлт­тық табиғи саябағының аумағын ен жай­лайтын жабайы өгіздер табыны құрылады. Саябақ басшыларының сөз­де­­ріне қарағанда, мұның өзі ­ХХ ғасырдың басында толық жойылып кетуге жақын қалған зубрлардың санын біртіндеп көбейтуге мүмкіндік бермекші. Қазақстанның жануарлар әлемін толықтыруды мақсат ететін бұл қадам еліміздің туристік кластер әлеуетін арттыруға да ықпал ететін болады. Бақберген АМАЛБЕК, «Егемен Қазақстан». Ақмола облысы.