Етек-жеңі кең пішілген Краснояр ауылы аумақтық жағынан да, әкімшілік тұрғыдан да облыс орталығының құрамына кіреді. Ұзақ жылдан бері ауызсудың азабын тартып келе жатқан елді мекенде 15 мыңға жуық адам тұрады.
Ауылдың кей тұсында су құбырынан сыздықтап су ағады. Болмашы ғана. Ал Октябрьдің 50 жылдығы, Краснояр, Школьная, Новоселов көшелерінің тұрғындары құбыр бойына су келсе, құтты бір ақ түйенің қарны жарылғандай қуанып мәре-сәре болады. Еңселі, көпқабатты үйлер былай тұрсын, бір қабатты жекеменшік үйлердің өзі суды ел жатып, ымырт үйірілген кезде ғана көреді.
Село тұрғындары айтып отырғандай, су тапшылығының зардабы аз емес. Біреуі үйіндегі қымбат су жылытқыштың істен шыққанын айтса, екіншісі кір жуатын машинаның моторын әлденеше рет ауыстырған. Енді біреуі жалғыз басты әпкесінің ауызсуды үнемі сатып алатынын айтып шағымданады.
«Селоның барлық тұсында су мәселесі өте өзекті. Ал біз тұрып жатқан бөлігінде мүлде жоқ деуге болады», дейді село тұрғыны Наталья Кузенная.
Оның сөзін селодағы білім ошағының ата-аналар комитетінің төрайымы әрі үш баланың қамқоршысы Анна Ерофеева да қуаттайды. Оның айтуынша, мектеп жасындағы балаларды жуындырудың өзі кәдімгідей мәселеге айналған.
«Көршілерден қайыр да, өкпе де жоқ. Олардың да көріп отырғаны осы. Осыдан бірнеше жыл бұрын су тапшылығы жаз айларында ғана туындайтын. Себебі көгеріп көктем шыққаннан бастап, село тұрғындары бақшаларын суарады. Жиын-терім біткеннен кейін судың тап бір молшылығын көрмесек те кемшілігі аз болатын. Биыл қыс бойы қаталап шықтық», дейді Анна Петровна.
Тұрғындардың айтуына қарағанда, тіршілік түн ортасы ауа басталады. Біреулер кір жуса, енді біреулері ертеңгі күннің қамын ойлап, ыдыстарына су құйып ала бастайды. Түн ұйқысын төрт бөліп қамданбаса бола ма? Егер қаусаған құбыр бойында апат орын ала қалса, тіршілік нәрі күндіз түгіл түнде де тамбайды.
Ауыл жұрты мәселенің мәнісі ішінде бассейні бар жаңа спорт кешені пайдалануға берілгеннен бері ме деп топшылайды. Өңірдің мақтанышына айналған зәулім заманауи ғимарат осыдан бірнеше ай бұрын есігін айқара ашқан. Пікір осы жерде екіге жарылады. Бірінші топ бассейні бар спорт кешені өскелең ұрпаққа қажет десе, екіншілері халық зардап шекпеуге тиіс деп санайды.
Селолық округтің әкімі Серікжан Мәкіштің айтуынша, жаңа спорт кешенінің су тапшылығына еш қатысы жоқ. Спорт кешені суды үнемі пайдаланбайды. Бассейн ашыларда ғана толтырылыпты. Күні бүгінге дейін сол су қолданыста.
«Негізгі мәселе селодағы су құбырларының ескіруінде. Сорғы стансасынан қысым қатты берілсе, құбыр бойында апат орын алуы әбден мүмкін. Бұл мәселе туралы «Көкшетау Су Арнасы» мекемесінің басшылығына ескертілген», дейді округ әкімі.
Мәселенің мәнісіне өзіміз де көз жеткізбек болып облыс орталығындағы осы тақылеттес бассейн қызметкерлерімен сөйлестік. Мамандардың айтуына қарағанда, бассейнді тек жөндеу немесе тазалау кезінде ғана сумен толтырылады. Қалыпты жұмыс кезінде су қайта айналымға түседі. Арнайы сүзгі арқылы тазартылып, қайтадан кәдеге жаратылады. Сол себепті кешендегі бассейннің су қысымына әсер етуі мүмкін емес.
Көкшетау қаласы мен Қызылжар ауылына ортақ су жүйесіне жауапты кәсіпорын «Көкшетау Су Арнасы» мекеменің сумен жабдықтау және су бұру жүйелерін бақылау жөніндегі инспекторы Қайрат Сүлейменовтің пікіріне қарағанда, негізгі мәселе – су құбырларының тозығы жетуі.
«Біз қажетті мөлшерде су бере алмаймыз. Қысымды да көтере алмаймыз. Егер көтерсек қаусап тұрған құбырлар жарылып кетеді. Апат та жиі тіркеледі», дейді инспектор.
Маманның айтуына қарағанда, магистралды құбырларда қысым техникалық талаптарға сай. Жалғыз мәселе – село ішіндегі су құбырларының тозығы жетуі. Кейбір құбырлардың пайдаланылып келе жатқанына жарты ғасырға жуық уақыт болған. Бір жақсысы, жобалық-сметалық құжаттама дайындалып жатқанға ұқсайды. Қыстан қысылып шыққан Краснояр селосының тұрғындары шілденің шіліңгір ыстығында күніміз не болады деп сары уайымға салынып отыр.
Ақмола облысы