АСТАНА. 11 наурыз. Алматы-Қаскелең трассасының бойында жол-көлік оқиғасы орын алып, салдарынан жүкті әйел қаза тапты. Бұл туралы nur.kz хабарлады.
Тарата айтар болсақ, Алматы облысындағы Райымбек даңғылымен үлкен жылдамдықпен жүрген «Тойота Лэнд Крузер» көлігінің жүргізушісі көлігін басқара алмай қалады.
Куәгерлердің айтуынша, ол «Ниссан Цефиро» көлігіне соғылып, содан барып жүк көлігіне ұрынады да заматта өртеніп кетеді. Ал жүк көлігі сол маңдағы ағашқа барып ұрылады.
Алдын-ала мәліметтер бойынша, ауруханаға жеткізілген «Ниссан Цефиро» жүргізушісі ауыр халде, ал жолаушылар орынында отырған аяғы ауыр әйел алған жарақаттардан қайтыс болды.
Жол апатына кінәлі «Тойота Лэнд Крузер» жүргізушісі оқиға орнынан ізін суытқан. Апаттың мән-жайы құқық қорғау органдарының қызметкерлері анықтауда.
Қайғылы оқиға Алматы-Қаскелең тас жолының 19-шы шақырымында орын алған.
Жолдыбай Базар.
Дерек, сурет: nur.kz.