АСТАНА. 11 наурыз. «Ислам мемлекеті» лаңкестік ұйымы Сaliphate book деп аталатын Facebook әлеуметтік желісінің баламасын жасап шығарды. Бұл туралы reuters.com хабарлады.
Сaliphate book сөзі «халифат кітабы» деген мағынаны білдіреді. Аталмыш желі техникалық ақауларға байланысты әзірге жұмысын тоқтатып тұрған көрінеді. Желі ашылған сәтте бірнеше адам оған тіркеліп үлгеріпті.
Оны құрастырушылардың айтуынша, әлеуметтік желі Twitter және Facebook желілерінде алмасуға болмайтын ақпараттарды қабылдап, жіберу үшін ашылған. Бұл сайт испан, голланд, португал, ағылшын, түрік, индонезия және яван тілдеріне аударылыпты.
Портал әдеттегі әлеуметтік желі сияқты, бірақ онда «Ислам мемлекетінің» логотипі бар. Ол танымал SocialKit платформасында жасалған. Мамандар Сaliphate book желісінің Ирактың Мосул қаласында тіркелгенін, бірақ мысыр серверлерін қолданатынын анықтады.
Желіні құрастырушылар өздерін «Ислам мемлекеті» қаржыландыратынын мәлімдеген. Олар сондай-ақ, осы желіні жасау арқылы өздерінің әлеммен бірге дамып келе жатқандарын да дәлелдейтіндерін жеткізген.
Жолдыбай Базар.
Дерек: reuters.com.
Сурет: haggin.az.