АСТАНА. 11 наурыз. «Манчестер Юнайтедтің» шабуылшысы Радамель Фалькао мен қақпашы Виктор Валдес команданың U-21 құрамы үшін алаңға шықпақ. Бұл туралы egemen.kz хабарлады.
«МЮ»-дың бас жаттықтырушысы Луи Ван Гал осындай шешім қабылдап отыр. Соған орай, футболшылар бүгін «Тоттенхэммен» болатын ойынға қатысу үшін жаттығу жасауда. Ван Гал Фалькаоны негізгі құрамда алаңға шығармақ. Аталған екі футболшыдан бөлек, 21 жасқа дейінгі ойыншылардың қатарында Андреас Перейра мен Джеймс Уилсон да бар. «МЮ»-дың бас командасынан орын таба алмай жүргендерді Ван Гал мырза осылай сынап көрмек. Фалькао осы маусымның басында Францияның «Монакосынан» ауысып келсе, Валдестің «қызыл сойқандардың» сапына қосылғанына көп болған жоқ. Испаниялық қақпашы өткен қысқы трансферлік маусымда келген еді. Әзірге «Манчестер Юнайтед» үшін ешқандай ойын өткізбеді. Ал Фалькао бүгінге дейін 20 ойын өткізіп, 4 голдың авторы атанды. Әйтсе де, соңғы екі ойында Ван Гал Фалькаоны алаңға шығармады.
Еламан Қоңыр.
Дерек: egemen.kz.
Сурет: vk.com.