Сарыағаш шекара отрядына қарасты «Қапланбек» бақылау-өткізу бекетінде Өзбекстан азаматы мінген «Daewoo Matiz» көлігінің жүк салғышынан 1955 дана тасбақа табылған. Үш қапшық пен бір қорапқа салынған тасбақалар тырбаңдамас үшін скотчпен желімдеп тасталыпты.
Шекара қызметі «Оңтүстік» өңірлік бөлімінің аға офицері Сырым Орманов: «Қазақстан Республикасы Қылмыстық кодексінің 234-бабы 1- бөлігі, яғни экономикалық контрабанда дерегімен қылмыстық іс қозғалды» – дейді.
Тасбақа – кейбір мемлекеттерде ұлттық асқа баланады, біреулер үшін жеңсік ас. Әсіресе, күніне сан мыңдаған шетелдік қонақтар сапырылысып келіп жататын Мәскеу мейрамханалары дастарқан мәзіріндегі қымбат тағам болып саналады. Күдікті қытай мейрамханаларына да өткізбек болған.
Қаскүнемнен қашып та құтыла алмайтын тасбақалар бірінші рет шекара бұзып жатқан жоқ. Осыдан екі-үш жыл бұрын оларды Мәскеу бағытына қатынайтын пойыздың жүк салғышында буылып-қатталып кетіп бара жатқан жерінен Қазақстан шекарашылары мен кеденшілері өзбек азаматынан тәркілеген еді. Сөйтіп, Арыс қаласындағы аң-құсты қорғау аймағына жіберілген. Құмшауыт даланың сәніне айналып, көзге жиі шалынар еді. Тегін олжа көрген біреулер теріп алып кетті ме, қазір көзге түсе қоймайды.
Бақтияр ТАЙЖАН,
«Егемен Қазақстан».
Оңтүстік Қазақстан облысы.