Қолдарына құрал-саймандарын алған “Жасыл ел” сарбаздары екінші саябақта тазалық жұмыстарын жүргізуде. Оларға бас-көз болып жүрген жетекшілері Әсия Еселбаева мен Наталья Колесникова және Клара Файзуллина. Саябақты көркейтуге Жаяу Мұса колледжінің 23 студенті жұмылдырылған. Олардың ішінде Үштерек, Беловка ауылдары мен Ақсу кентінен келіп жұмыс істейтіндер де бар. Сондықтан уақытты тиімді пайдалану мақсатында жасылелдіктер түскі асты саябақта ішеді.
– Бүгінгі күні қалада тұратын балалар да ауыл шаруашылығы еңбек құралдарымен жұмыс істеуді үйреніп, шөп шауып, кепкен ағаштарды кесуге дағдыланды. “Жасыл ел” бағдарламасы жастарды еңбекке баули отырып, олардың отаншылдық сезімін ояту, жас ұрпақты экологиялық тәрбиеге үндеу бағытында зор әсерін тигізеді. Демалыс саябағында жұмыс істеген кезде құрал-саймандарды сақтауға саябақ әкімшілігі мен балалар шығармашылығы үйі көмек берді. Сондай-ақ, студенттерге құрал-саймандарды қайрап, кеңпейілдік танытқан “Нұр-Ақсу” пәтер иелері кооперативінің төрағасы Николай Заставскийге алғысымызды білдіреміз, – дейді Әсия Еселбаева.
Қаланың ажарланып, көркейе түсуіне селқос қарамайтын жастар бүгінгі күні қоларамен кепкен бұталар мен ағаштарды кесіп, шалғымен шөп шабуға кіріскен. Сондай-ақ, қалың біткен арам шөптерді жұлып, қапшықтарға салып, тазалауда.
– Мен Беловка кентінде тұрамын. “Жасыл ел” сарбаздары қатарында жұмыс істейтініме өте қуаныштымын. Бұл бағдарлама арқылы қаланы көріктендіріп, тазалық жұмыстарын жүргізумен қатар, жастар тәжірибе жинақтап, өз еңбегімен қаржы табу мүмкіндігіне ие болады, – дейді құқықтану факультетінің 3-курс студенті Зарина Қайсарина.
Ақбота СЕЙСЕНБАЕВА.
Павлодар облысы, Ақсу қаласы.