Алматылықтар алғаш рет бір жерден, бір көрмеден Алматы мен Астана қалаларында өтетін қысқы Азия ойындарына дайындық жұмыстарының жетістіктерін тамашалай алады. Осылайша оңтүстік астанада “Азиада-2011 қарсаңында” атты фотокөрменің тұсауы кесілді.
Алматы қонақтары үшін баратын жер, тамашалайтын орын жеткілікті. Бір ғана Алматыда 15 көрме мен көркемсурет галереясы жұмыс істейді. Енді олардың қатарына 7-ші Қысқы Азия ойындарын насихаттауға арналған көрме қосылып отыр. Сонау 90-шы жылдардың орта белінен бастап қазақстандық спортшылар Қысқы олимпиада дүбіріне қосылған болса, араға санаулы жылдар ғана салып, өз еліміз Ақ Азиаданың алауын жақпақ.
Қазірдің өзінде 7-ші Қысқы Азия ойындарын ұйымдастыру комитетінің атқарушы дирекциясы бірқатар жетістіктерге жетіп, дайындық барысының табыстарын бұқараға таныстырып отыруды жөн деп шешкен.
Алматы қаласының тұрғындары мен туристер Азиаданың дайындық кезеңдерін әлеуметтік жарнама жасауды көздейтін “Столичный” атты дүкен аумағындағы галереядан көре алады. Кәсіпқой фототілшілердің дайындық кезеңінің ең қызықты сәттерін, спорттық нысандардың айшықты тұстарын “аулаған” туындылары дайындық барысынан толыққанды ақпар береді.
Айнаш ЕСАЛИ. АЛМАТЫ.