“Солтүстік” дивизионына кіретін Қарағанды мен Ақмола облыстарының арасында өткен айқаста алаң иелері 16:13 есебімен жеңіске жетті. Кездесуде алаң иелері бес рет жеңсе, қонақтар төрт рет ұтты. Ал 52 кг. салмақтағы бір жекпе-жек 5:5 есебімен тең аяқталды.
Бұл кездесудің қызықты өтетінінің жөні де бар еді. Кезінде, яғни Кеңес Одағы жылдарында, одан кейін еліміз тәуелсіздігінің алғашқы кездерінде талай талантты боксшыларды тәрбиелеген Қарағанды мен Жезқазған өңірі еліміздің бокс ұстаханаларының біріне айналғаны шындық. Қазіргі күні де өтпелі кезеңнің қиыншылықтарын бастан өткерген облыстық бокс федерациясы жергілікті жерде спорттың осы түрін дамыту, оны насихаттау десе алдарына жан салмай келеді. Оның айқын мысалын Қарағандыда Қазақстан Бокс федерациясының кубогы жолында өткен кезекті бәсекеде көре алдық. Мұнда өткен доданың бір ерекшелігі, шілде айынан бері жалғасып келе жатқан жекпе-жектерде алғаш рет облыс атынан шетелдің үш бірдей боксшысы сынға түсті. Өзбекстандық 81 кг. салмақтағы Атабек Ибраимов пен Нозимжан Собиров (69 кг.) және ресейлік Зинат Жандыбаев (56 кг.) Қарағанды облысының атынан шығып, соның екеуінде өзбекстандықтар жеңіске жетсе, соңғысы Жандос Момыновтан 0:1 есебімен ұтылып қалды. Облыстық бокс федерациясының атқарушы директоры Берікбол Қасымхановтың айтуынша, шетелдіктердің сынға түсуі үшін олармен алдын-ала келісім-шарт жасалған.
Енді жекпе-жектердің өзіне келер болсақ, ең жеңіл, яғни 49 кг. салмақта Теміртас Жүсіпов алғаш болып Ақмола облысына жеңіс әкелді. Ол өз салмағында Мірлан Түрікбайұлын 1:0 есебімен ұтты. Одан кейін 52 кг. салмақтағы кездесу, жоғарыда атап өткеніміздей, 5:5 есебімен тең аяқталды. Көкшетаулық Нұрсұлтан Қосшығұлов пен Қанат Тұрғанбаевтың арасында өткен бәсеке барлық жағынан алғанда қызықты да, тартысты болды. Бұл кездесуде екеуінің де жеңетін жөні бар еді. Алайда, үшінші раундтың соңына дейін бір-біріне әлі келмеген боксшылар шаршы алаңды келесі салмақтағыларға босатты. 60 және 64 кг. салмақтағы Ақмола облысының өкілдері Дәулет Мұқанов пен Дамир Қанафин рингке уақтылы көтеріле алмаған соң, жеңіліс берілді. Сөйтіп, қарағандылық Ержан Мүсәпіров пен Думан Сүлейменов оңай олжаны қалталарына басты. Мұндай жағдай 91 кг. салмақта да қайталанды. Көкше өңірінің тумасы Сүйіндік Қолымбаев Алексей Севостьяновқа қарсы шаршы алаңға шықпады. Дегенмен, басқа салмақтарда көкшетаулық Нұрдәулет Жарманов (75 кг.) пен Андрей Плахотнюк (91 кг.) қарсыластарын оңдырмай жеңді. Ең соңғы жекпе-жекке шыққан қарағандылық аса ауыр сақмақтағы Виталий Бондаренконы көпшілік жақсы білуі тиіс. Биыл Қазақстан чемпионатының финалына дейін сүрінбей жеткен Бондаренко бұл жолы өзінен тәжірибесі аздау қарсыласынан жеңіліп қалды.
Келесі кездесулер 4 қыркүйек күні Қостанайда жергілікті боксшылар мен Солтүстік Қазақстан облысының командасы арасында өтеді.
Қарағандыда Қазақстан Бокс федерациясының кубогы жолындағы кезекті жекпе-жектер өтті.
Дастан КЕНЖАЛИН.