Тағзым
Атақ-даңқы алты алашқа жайылып, Пір атанған қасиет иесі Бекет Мырзағұлұлының туғанына 260 жыл толуына орай Үшқоңыр ауылы аумағында ас беріліп, аламан бәйге өткізілді. Алматы облысының әкімі Серік Үмбетовтің қолдауымен және “Дәулет-Бекет” жауапкершілігі шектеулі серіктестігінің ұйымдастыруымен өткен бұл жиынға қатысушылар ғұлама өміріне қатысты құнды деректерді тілге тиек етті. “Бекет ата асының Мемлекет басшысының туған ауылы Үшқоңырда өтуінің үлкен тәрбиелік маңызы зор. Өйткені, ас – ел мен елді жақындататын, адамдарды бауырмалдыққа, ынтымаққа үндейтін игілікті іс шара ғой. Ал, асты ұйымдастырып отырған “Дәулет-Бекет” ЖШС-ның төрағасы Сыдық Дәулетовтің ұлт тарихындағы ірі тұлғаға бағыштаған құрметі көңілге қуаныш ұялатады. Кейінгі ұрпақ үшін ұлылар рухын ұлықтаудан артық мақсат болуы мүмкін бе дейді Қарасай аудандық ақсақалдар алқасының төрағасы Сейітхан Исаев.
Шын мәнісінде де, “Өлі риза болмай, тірі байымайды” демекші, бүгінгі ұрпақ үшін туған халқын қалтқысыз сүйіп, туған еліне адал қызмет етудің озық үлгісін көрсеткен ата-баба рухын асқақтатудан артық мүдде, одан қымбат парыз жоқ екендігі сөзсіз. “Мәдинада – Мұхаммед, Түркістанда – Қожа Ахмет, Маңғыстауда – Пір Бекет” деген сөздің өзі көп нәрсені аңғартатындығы айдан анық. Ғұмыр бойы Құдай мен Құран сөзін насихаттап, ұрпақтарға тағылымы мол тәрбие беруді мақсат еткен Пір Бекеттің өмірін зерттеушілер оның бойындағы асыл қасиеттерді де атап айтады. Әсіресе, әулиенің көріпкелдік, ағартушылық, ұстаздық және сәулетшілік ерекше қабілеті көпшілікті таңғалдырмай қоймайды. Ең бастысы, Пір Бекеттің қолына қару алып жауға қарсы шаппаса да, өз бойындағы асқан қасиеті арқылы мың сан қолға үрей туғызып, оқ атпастан оларды қашуға мәжбүр етуі Жаратқанның оған жіберген құдіреті демеске амал жоқ.
Бекет Мырзағұлұлының туғанына 260 жыл толуына арналған салтанатты жиынға Қазақстанның халық жазушылары Қадыр Мырза Әлі, Тұманбай Молдағалиев, Қазақстанның халық әртісі Асанәлі Әшімов қатысып, шынайы тілектерін білдірді. “Нұр Отан” ХДП Маңғыстау облыстық филиалы төрағасының бірінші орынбасары Жауынбай Қараев бастаған делегацияның мүшесі, облыстық ақсақалдар алқасының төрағасы Өмірзақ Озғанбай әулиенің өмір жолы туралы кеңінен баяндады. “Бекет атаның бүкіл ғұмыры дін-шариғат жолына адал қызмет етудің, туған халқының бақытты болу күресіне арналып өтті. Бекет ата – ұлттық деңгейдегі тұлға, өйткені ол құлағанды демеп, қысылғанды жебей білген халық қамқоршысы да болды. Сол үшін де кейінгі ұрпақ – мына біздер әулие ата рухы алдында басымызды иеміз” деді ғалым.
Атырау облысы, Жылыой ауданы Ақкиізтоғай ауылында дүниеге келіп, ХVІІІ ғасырда өмір сүрген абыз ағартушыға арналып Көкбастау ат бәйгесі алаңында аламан бәйге өтті. Басты жүлде – “Нива” автокөлігі Жамбыл ауданының тұрғыны Аян Әбікеновке берілді. Қарасайлық бапкер Бауыржан Кенбаев “Жигули” автокөлігін иеленді. “Бабаларын қалтқысыз қастерлей алған халық балаларының болашағын да қапысыз қамдай алмақ” деп Мемлекет басшысы атап айтқандай, бүгінгі жиынның танымдық ықпалы зор. Менің түйгенім – Жаратқанның сүйікті құлы – Бекет атамызға деген шынайы сезімімізді жұдырықтай жүрегіміздің төрінде сақтасақ болғаны. Бағалай білсең, бақыт деген осы” дейді осы жиынға орай “Жер киесі” атты журналды дайындап, шығарған әскери журналист Кенжебек Тұманбайұлы.
Оның бұл пікірін белгілі кәсіпкер Сыдық Әбуұлы да қолдайды. “Ес білгеннен бері құлағымызға сіңісті болған аяулы есім, ол – Бекет ата. Әбіш ағамыз “Бекет ата” атты кітапқа жазған алғысөзінде “Әлсізге – медет, күштіге – айбар, асқанға – тосқан, ұрпаққа – ұстаз, ел иесі, жер киесі” деп айтқан еді. Бұдан артық атаның қасиетіне қандай теңеу жарасар. Атаның рухына арналған ас хақ дініміз – исламның бес парызының бірі – отыз күн оразаның алдында, рухани-танымдық бағытта өткендігіне қуаныштымыз”. Салтанатты рәсімде Ғұбайдолла қажы Әбішұлы Бекет Мырзағұлұлының рухына арнап Құран-хатым түсіріп, еліміздің амандығына, тәуелсіздігіміздің мәңгілік болуына тілек қосты. Бабалар рухына кейінгі ұрпақтың тағзымы – келешекке кемел де бақытты жол ашпақ. Ұлылар ұлағаты осы.
Бақыт БАЛҒАРИНА. Алматы.