ЕҚЫҰ-ның Іс басындағы төрағасы, Қазақстан Республикасының Мемлекеттік хатшысы – Сыртқы істер министрі Қанат Саудабаев Қырғыз Республикасы өтпелі кезеңінің Президенті Роза Отунбаевамен телефон арқылы сөйлесті, деп хабарлады ҚР СІМ-інің баспасөз қызметі.
Сұхбаттастар Қазақстан Президенті Нұрсұлтан Назарбаев достас мемлекет үшін ұсынған Қырғызстанды экономикалық оңалту бағдарламасын жүзеге асыру жайын талқылады. Әңгіме барысында Қырғызстандағы ағымдағы жағдайға, оның ішінде парламент сайлауына баса назар аударылды.
ЕҚЫҰ/ДИАҚБ 24 ұзақ мерзімді және 300 қысқа мерзімді байқаушылар миссиясын жібергені белгілі. Қазіргі кезде Бішкекте ЕҚЫҰ-ның жанжалдардың алдын алу жөніндегі орталығының директоры Херберт Зальбер ЕҚЫҰ-ның полициялық консультативтік тобының алдағы қызметі бойынша консультациялар өткізуде.
Тараптар алдағы аптада Бішкекке ЕҚЫҰ-ның Іс басындағы төрағасының Арнайы өкілін, ҚР Парламенті Мәжілісінің вице-спикері Жәнібек Кәрібжановты жіберу туралы уағдаластыққа қол жеткізді. Ол БҰҰ мен ЕО-ның тең төрағалары Мирослав Енчамен және Пьер Морельмен бірлесіп, Қырғыз Республикасының басшылығымен осы елге халықаралық қоғамдастық тарапынан ықпал ету шараларын одан әрі үйлестіру бойынша жан-жақты консультациялар өткізетін болады.